Intanga z’ingurube ziragezwa ku borozi hakoreshejwe drones

Manikuzwe Providence ushinzwe gukurikirana ibikorwa by’umushinga wo gutwara intanga z’ingurube muri RAB avuga ko ikigo cya Zipline kigira utudege duto tudatwarwa n’abapilote kimaze gukwirakwiza intanga z’ingurube zigera ku 1000 mu gihugu hose.

Ni gahunda imaze amezi abiri igamije gucyemura ikibazo cyo kubona icyororo cyiza cy’ingurube.

Manikuzwe yabwiye itangazamakuru ko Zipline ifite ubushobozi bwo kugeza ku borozi intanga zisaga 300 ku munsi hakoreshejwe utudege tudatwarwa n’abapilote (Drones)

Akadege kamwe gashobora kujyamo intanga enye icyarimwe kakazigeza ku cyerekezo kahawe.

Iyo RAB imaze gufata intanga ku ngurube izohereza mu bubiko bwa Zipline, zikabikwa mu buryo bwizewe.

Umworozi ufite ingurube yarinze ushaka intanga yegera Veterineri, maze nawe akamenyesha ababishinzwe muri RAB nabo bakamenyesha Zipline ubwoko bw’intanga akeneye.

Hari Abaveterineri basaga 500 bahuguwe mu gihugu hose bafasha aborozi mu buryo bwihuse.

Ni gahunda idatinda kuko mu minota itanu RAB imaze kuvuga ubwoko bw’intanga bwoherezwa, Drone ihita yogoga ikirere ikazigeza aho yatumwe ikagaruka ku kibuga cyayo.

Ni uburyo bukoreshwa kandi bwihutisha igikorwa cyo kugeza intanga aho zikenewe. Mbere ryari ihurizo kugeza intanga mu misozi hari imihanda idakora neza.

Umworozi yishyura amafaranga 3500 Frw kuri Doze ya ML 100, ntiyishyura igiciro cy’urugendo rwa Drone.

Manikuzwe yagize ati “Umworozi icyo asabwa abwira umuganga w’amatungo ubwoko bw’icyororo ashaka, umuganga akaduhamagara akatubwira Ubwoko bw’intanga akeneye n’ikigo nderabuzima kimwegereye.”

Akomeza agira ati “Ku ndege birihuta, iyo umworozi asabye intanga ari mu rugo, ajya kugera ku kigo nderabuzima intanga zahageze.”

Safari Sylvestre umukozi mu Kigo cy’Igihugu cy’Ubuhinzi n’Ubworozi RAB akaba n’umushakashatsi kuri Station ya RAB i Muhanga, avuga ko mbere abaveterineri bageraga ku mworozi igihe cyiza cyo gutera intanga cyarenze bigatuma intanga zidafata.

Yavuze ko bafite isekurume z’ingurube z’icyororo zakuwe mu mahanga zikurwaho intanga zoherezwa mu borozi.

Usibye mu kigo cya RAB kiri i Muhanga, hari isekurume z’ingurube aborozi bafataho intanga mu Karere ka Gicumbi, Bugesera na Rwamagana. Mu minsi ya vuba ziragezwa no mu Karere ka Rusizi.

Aborozi bashishikarizwa kwitabira iyi gahunda yo kugura intanga z’ingurube kuko zitanga umusaruro ushimishije.