Mbere y’uko APR FC ihura na Bugesera FC kuri iki Cyumweru, umuyobozi wayo Lt Gen Mubarakh Muganga yibukije abakinnyi n’ikipe muri rusange ko ari intoranywa zizi igikenewe ndetse intsinzi ari yo ituma bahora ku gasongero.
Ibi yabigarutseho kuri uyu wa Gatanu, tariki 15 Mata 2022 ubwo yakurikiranaga imyitozo itegura umukino bafitanye n’ikipe ya Bugesera FC kuri iki Cyumweru.
Umuyobozi wa APR FC, Lt Gen Mubarakh Muganga, ubutumwa yahaye abakinnyi n’abatoza yabibukije ko intego ari insinzi ibafasha guhora ku gasongera kandi bakarangwa n’ikinyabupfura mu byo bakora byose.
Ati “Shampiyona aho igeze irakomeye cyane ariko kuko muri abakinnyi b’intoranwa muzi icyo tuba dukeneye, ni intsinzi ituma duhora ku gasongero tukitwara neza kuko mufite impano yihariye, tubategerejeho byinshi imbere.”
Yakomeje agira ati “Ariko ibyo byose bihera ku myitwarire yanyu myiza, niyo ituma umuntu agera kuri byinshi byiza. Iyo discipline ikemangwa no kugera ku ntsinzi biragorana niyo mpamvu n’ubuyobozi bwa APR butazuyaza gutandukana n’abarenga kuri izo ndangagaciro.”
Lt Gen Mubarakh Muganga yanaboneyeho kongera gushimira umutoza Adil Mohammed n’abagenzi be ku bumenyi bakomeje gutanga ku mpano z’urubyiruko rw’u Rwanda.
APR Fc iri kwitegura umukino wo kuri iki Icyumweru, tariki 17 Mata 2022 na Bugesera FC, imyitozo ya nyuma itegura umukino niyo kuri uyu wa Gatandatu mbere yo kwerekeza i Nyamata gucakirana na Bugesera FC.
Kugeza ubu APR FC iri ku mwanya wa kabiri n’amanota 48, nubwo itarakina umunsi wa 23 wa shampiyona, aho ikurikiye ikipe ya Kiyovu Sports yatsikiye kuri Gasogi United itsindwa ibitego 2-0 ikaguma ku mwanya wa mbere n’amanota 50.
Mu gihe APR FC yatsinda Bugesera FC yahita igira amanota 51 irusha Kiyovu Sports inota rimwe. Kugeza ubu mu bakinnyi batanu bafite ibitego byinshi nta wa APR FC urimo.
- Advertisement -
Mu mukino ubanza wa 1/8cy’igikombe cy’mahoro, APR FC yatsindiye igitego 1-0 i Nyamagabe ikipe ya Amagaju FC kuri sitade Nyagisenyi.
NKURUNZIZA JEAN BAPTISTE / UMUSEKE.RW
