Umuyobozi w’akarere ka Nyanza asaba ababyeyi kubwira ukuri abana amateka ya Jenoside yakorewe Abatutsi mu 1994 uko yateguwe nuko yashyizwe mubikorwa, bakanarinda urubyiruko kwirinda ingengabitekerezo ya Jenoside.
Mu muhango wo kwibuka ku nshuro ya 28 jenoside yakorewe Abatutsi mu 1994 mu karere ka Nyanza kuri uyu wa 24 Mata 2022, Umuyobozi w’akarere Ntazinda Erasme yihanganisha abarokotse jenoside asaba ababyeyi kwigisha abana urukundo, bababwiza ukuri ku mateka ya jenoside yakorewe abatutsi, bakanabarinda ingengabitekerezo yayo.
Ati“Ababyeyi bafite inshingano zo kwita ku rubyiruko bakanarurinda ingengabitekerezo ya jenoside kugirango itazongera kubaho.”
Ingabire Liliane warokokeye mu Murenge wa Busasamana ho mu Karere ka Nyanza wanatanze ubuhamya avuga ko yabayeho mu buzima bubi mu gihe cya jenoside ,ashimira abamufashishe byanatumye arokoka jenoside yakorewe abatutsi.
Minisitiri w’uburezi Dr.Uwamariya Valentine akaba n’imboni y’Akarere muri Guverinoma yihanganishije imiryango yabuze ababo muri Jenoside yakorewe abatutsi, agaya abayiteguye bakanayishyira mu bikorwa, asaba abarokotse gukomera.
Ati“Birababaje cyane kuko Jenoside yashobotse kubera abiyitaga intiti bari barize.”
Hashyinguwe mu cyubahiro imibiri 179 irimo iyabonetse mishya n’iyimuwe ikuwe mu mva zo mu Mirenge ya Busasamana, Mukingo na Kigoma.
Mu Rwibutso rwa Nyanza haruhukiyemo imibiri 24,683, umuhango wo Kwibuka wasojwe no gushyiraho indabo no kunamira inzirakarengane zishyinguye muri uru Rwibutso.
Théogène NSHIMIYIMANA / UMUSEKE.RW/Nyanza
