Ku wa Mbere tariki 13 Kamena, hateganyijwe imikino y’umunsi wa 29 ya shampiyona y’icyiciro cya Mbere.
Ni imikino ihishe byinshi kuko haracyari urugamba rw’amakipe abiri ahanganiye igikombe cya shampiyona, n’andi abiri agomba kumanuka mu cyiciro cya Kabiri.
Amakuru ava i Ngoma UMUSEKE wamenye, aravuga ko ikipe ya Étoile de l’Est FC itishimiye abasifuzi yahawe ku mukino izakira Gorilla FC. Aba basifuzi ni Dushimina Eric uzaba ari hagati, Safari Hamiss uzaba ari umwungiriza wa Mbere na Ayubusa Pacifique uzaba ari umwungiriza wa Kabiri.
Ubuyobozi bwa Étoile bwagize impungenge kuri aba basifuzi, bivugwa ko bashobora kuba bafitanye umubano wihariye na Perezida wa Gorilla FC, Hadji Mudaheranwa Yussuf.
Muri uyu mwaka w’imikino, hakunze kugaragara ibibazo bitandukanye mu misifurire ndetse bamwe mu basifuzi bagiye bafatirwa ibihano bitandukanye.
UMUSEKE.RW
