Umunyabigwi muri ruhago nyarwanda Murangwa Eugene wakiniye ikipe ya Rayon Sports n’ikipe y’igihugu AMAVUBI agiye kurongora Umuyobozi wungirije wa Banki nkuru y’igihugu (BNR), Hon. Hakuziyaremye Munyana Soraya wanabaye Minisitiri w’ubucuruzi n’inganda.
Murangwa Eugène yamenyekanye muri Rayon Sports ya mbere ya Jenoside yakorewe Abatutsi ndetse akanayirokoka kubera ko yakiniraga iyi kipe ikunzwe na benshi mu Rwanda.
Uyu mugabo azwi nk’umwe mu banyezamu beza ikipe ya Rayon Sports, yakiniye iyi kipe imyaka 11. Kuva 1986 kugeza 1997.
Eugene Murangwa atuye ku mugabane w’u Burayi aho akora ibikorwa bitandukanye bigamije kurwanya amacakubiri, ingengabitekerezo ya Jenoside no kwigisha ubumwe n’ubwiyunge binyuze muri siporo.
Mu mwaka wa 2018, Murangwa yahawe umudali w’icyubahiro n’umwamikazi w’Ubwongereza, Elisabeth wa II kubera ibikorwa bye bya siporo.
Soraya Hakuziyaremye ugiye kurongorwa na Eugene Murangwa, ni umunyarwandakazi w’umucuruzi, umunyamwuga mu bijyanye n’imicungire y’imari akaba n’umunyapolitiki wabaye Minisitiri w’ubucuruzi n’inganda mu nama y’abaminisitiri, ku ya 18 Ukwakira 2018.
Kuwa 15 Werurwe 2022 nibwo Madamu Soraya yasimbuwe na Habyarimana Béata muri MINICOM. Ubu ni Visi Guverineri wa Banki Nkuru y’u Rwanda.
Ubukwe bwa Murangwa Eugene na Hon Hakuziyaremye Munyana Soraya buzaba kuwa 14 Kanama 2022.
- Advertisement -
NDEKEZI JOHNSON / UMUSEKE.RW
