Igare ryagonze umukecuru mu muhanda wo mu Kagari ka Gatagara mu Murenge wa Mukingo mu Karere ka Nyanza ahita yitaba Imana, umunyonzi n’uwo yari atwaye bakomeretse.
Iyo mpanuka yabaye ku mugoroba wo ku wa 18 Kamena 2022 ihitana umukecuru witwa Uwimana Liberata ufite imyaka 65.
Igare ryari ritwawe na Dushimimana Claude yavaga mu Ruhango yerekeza i Nyanza atwaye uwitwa Nzayisenga Valens, aba bombi bakomeretse bajyanwa kuvurirwa ku Kigo Nderabuzima cya Kiruri.
Umunyamabanga Nshingwabikorwa w’Umurenge wa Mukingo Kayigyi Ange Claude yabwiye UMUSEKE ko nyakwigendera yari asanzwe atuye mu Karere ka Kamonyi, yari yatashye ubukwe muri kariya gace.
Ubwo bari ku muhanda bategereje imodoka ngo ibacyure nibwo yahuye niriya mpanuka yamuviriyemo urupfu rw’ako kanya.
Gitifu Kayigyi yagize ati “Yari yambutse umuhanda bagiye gusanganira imodoka ku rundi ruhande, yambutse ku gatebe ka Marita hakurya y’umuhanda ahita agongwa.”
Umurambo wa Uwimana Liberata wajyanywe mu buruhukiro bw’Ibitaro by’Akarere ka Nyanza.
Umunyamabanga Nshingwabikorwa w’Umurenge wa Mukingo asaba abatwara amagare kuyashyiraho amatara mu rwego rwo kwirinda impanuka mu gihe cy’ijoro.
THEOGENE NSHIMIYIMANA / UMUSEKE.RW i Nyanza
