Ikipe ya Volleyball y’Ikigo Gishinzwe gukwirakwiza amashanyarazi, REG VC, yahigitse Gisagara Volleyball Club, yegukana igikombe cya shampiyona, Marshal aha ikaze abifuza kuza mu butoza.
Iyi shampiyona yari yatangiye tariki 1 Ukwakira 2022, nyuma y’igihe idakinwa kubera ibihano byari byahawe Ishyirahamwe Nyarwanda ry’uyu mukino [FRVB]. Iyi shampiyona yashyizweho akadomo ku Cyumweru tariki 22 Mutarama 2023.
Nk’uko byari byabanje gutangazwa na FRVB nk’Urwego ruberera umukino wa Volleyball mu Rwanda, iyi shampiyona yakinywe mu duce umunani [phases].
Iyi shampiyona kandi yakiniwe mu bice bitandukanye by’Igihugu, mu rwego rwo kwegereza uyu mukino Abanyarwanda muri rusange.
Byasabye ko amakipe y’abagabo agera ku mukino wa nyuma bisa nk’ibitarasobanuka, n’ubwo REG VC yasaga n’iyamaze kwegukana iki gikombe ubwo yabonaga itike yo kugera ku gace ka munani ari na ko ka nyuma.
Ikipe ya REG VC n’ubwo yatsinzwe na Gisagara VC umukino w’agace ka munani ku maseti 3-1, nyuma yo kwegukana iya mbere, iyi kipe itozwa na Marshal yaje itsinda iya kabiri ariko izindi ebyiri za nyuma zombi irazitsindwa.
Nyuma yo kubura umwanya wa mbere, Gisagara VC yegukanye umwanya wa kabiri, APR VC yegukana umwanya wa gatatu.
Mu bagore ho, APR WVC yegukanye igikombe cya shampiyona, ikurikirwa na Forefront WVC yavutse uyu mwaka na RRA WVC.
Ikipe ya mbere mu bagabo yahawe imidari ya zahahu n’amafaranga miliyoni 2 Frw, iya kabiri ihabwa imidari n’amafaranga miliyoni 1.5 Frw, mu gihe APR WVC byarangiye yegukanye umwanya wa gatatu wa shampiyona ihembwa miliyoni 1 Frw.
- Advertisement -
Mu bagore, ikipe ya mbere yahembwe imidari ya zahabu, ihabwa igikombe na miliyoni 2 Frw, iya kabiriiba Forefront WVC ihita yegukana miliyoni 1.5 Frw na RRA WVC yabaye iya gatatu igahembwa miliyoni 1 Frw.
Uretse ibi bihembo kandi, ikipe zose zitabiriye shampiyona zahawe ibyemezo bibyemeza [Certificates] mu rwego rwo kuzishimira ko zitabira shampiyona y’uyu mwaka w’imikino 2022/2023.
Mu muhango wo gutanga ibihembo, hanahembwe bamwe mu bakinnyi babaye indashyikirwa mu mukino wa Volleyball, by’umwihariko mu ikipe y’Igihugu. Aha harimo Yakan Lawrence, Karera Emile Dada na Dusabimana Vincent uzwi nka Gasongo. Aba bose bashimiwe ku mutahe batanze mu mukino wa Volleyball y’u Rwanda nk’abakinnyi.
FRVB kandi yahembye Ntangengwa Olivier na Gatsinzi begukanye umwanya wa Kane mu mikino ya Commonwealth iheruka kubera i Birmingham mu Bwongereza, hanahembwa Gigasaraga VC yabashije kwegukana umwanya wa Gatatu muri shampiyona Nyafurika.
Perezida wa FRVB, Mé Ngarambe Raphaël, yavuze ko yishimiye uko shampiyona muri rusange kandi ko gukina imikino yegeranye byafashije amakipe n’abakinnyi muri rusange kugera ku rwego rwiza.
UMUSEKE.RW