Mu nkengero za Sake, imirwano ikomeje guca ibintu hagati ya FARDC na M23

Mu masaha ya kare kuri uyu wa Gatatu, imirwano hagati y’ingabo za Leta ya Congo, FARDC n’umutwe wa M23 yakomeje mu duce twa Mushaki na Karuba muri Teritwari ya Masisi.

Abanyamakuru bakorera mu Burasirazuba bwa Congo bavuga ko imirwano yatangiye mu gitondo kuri uyu wa Gatatu ndetse ituma abaturage batuye agace ka Sake bongera guhunga berekeza mu Mujyi wa Goma, ari na wo murwa mukuru w’Intara ya Kivu ya Ruguru.

Benshi mu bahunga bagenda n’amaguru, kandi harimo abana nk’uko umunyamakuru Daniel Michombero abivuga, uretse ngo abajya i Goma hari n’aerekeza i Minova muri Kivu y’Epfo.

Imirwano yabereye mu nkengero z’uduce twa Mushaki hafi y’agace gatuwe ka Sake.

Umunyamakuru Justin KABUMBA na we ukorera mu Burasirazuba bwa Congo, aravuga ko abatuye ahitwa Mubambiro muri Gurupema ya Kamurhonza bumvise amasasu y’imbunda nini n’intoya.

Ingabo za Leta, FARDC ngo zakomeje kurasa mu duce tugenzurwa n’umutwe wa M23 kugira ngo zikumire inyeshyamba gufata agace ka Sake.

Justin KABUMBA na we avuga ko imirwano yabereye mu gace ka Mushaki, ndetse n’ahitwa kuri antenne mu rusisiro rwa Nenero.

Zimwe mu mbuga zikoreshwa n’abari ku ruhande rw’inyeshyamba za M23, na zo zemeje iyi mirwano zivuga ko yatangiye mu gitondo ku isaha ya saa kumi n’imwe aho ingabo za Leta ya Congo, FARDC n’abazifasha (FDRL-MAÏMAÏ-NYATURA-ACPLS-PARRECO-NDCRENOVE) n’Abacanshuro bagabye igitero ahitwa Luhonga hafi ya Nenero ndetse no mu duce twa Mushaki, Ruvunda n’ahitwa Kingi.

Umutwe wa M23 uvuga ko ushaka kugenzura agace ka Sake.

M23 kandi yavuze ko yafashe agace k’ubukerarugendo ka Mushaki na Karuba muri Teritwari ya Masisi. Gusa, andi makuru avuga ko ingabo za Leta ari zo zikigenzura aka gace n’utundi duce tugakikije.

Agace k’imisozi ya Mushaki na Nenero ni ahantu h’ingenzi ku rugamba, hari hejuru y’agace gatuwe ka Sake, aha niho imirwano imaze iminsi ibera, hakaba ari yo nzira isigaye ishobora kwerekera mu Mujyi wa Goma.

Yaba imyanzuro yafatiwe mu nama y’Abakuru b’Ibihugu yabereye i Addis Ababa, ndetse n’iyayibanjirije y’i Bujumbura, bigaragara ko itabujije impande zihanganye gukomeza urugamba.

Inyeshyamba zayogoje Congo zahawe igihe ntarengwa cyo kuva aho zigaruriye

UMUSEKE.RW