Mu mukino ubanza wa 1/2 mu gikombe cy’Amahoro, ikipe ya APR FC na Kiyovu Sports zanganyije igitego 1-1.
Ni umukino witabiriwe n’abafana baringaniye ku mpande zombi ariko mu myanya y’icyubahiro bari benshi.
Saa cyenda z’amanywa, umusifuzi Nkinzingabo Jean Marie Vianney uzwi nka Jannot, yari atangije uyu mukino wari uhanzwe ijisho na benshi, cyane ko izi zombi ari zo zihanganiye igikombe cya shampiyona.
Urucaca rwatangiye rutakaza imipira myinshi hagati mu kibuga, kuri Nshimirimana Ismaël Pichu na Mugiraneza Frodouard.
Uku gutakaza imipira cyane, byaje kuba bibi ku munota wa 23 ubwo Riyad Nordien yawutakaza, maze Ruboneka Bosco aha umupira mwiza Kwitonda Alain utazuyaje wahise atsinda igitego.
Kubona igitego hakiri kare ku kipe y’Ingabo, byasobanuraga ko ikigiye gukurikira ari ukukirinda cyangwa igashaka ikindi.
Iminota 45 yarangiye APR FC iri mbere n’igitego 1-0.
Mu gice cya Kabiri, Mateso Jean de Dieu yahise akora impinduka akuramo Erisa Ssekisambu wasimbuwe na Muhozi Fred.
Gukora izi mpinduka kuri iyi kipe yo ku Mumena, byatumye itangira gusatira no gutindana umupira biciye kuri Muhozi.
- Advertisement -
Urucaca rwahise rusa n’urukangutse ndetse rutangira kwiharira umupira, ari na ko rushaka igitego cyo kwishyura.
Ku munota wa 65, ikipe y’Ingabo yagize ibyago ivunikisha Ruboneka Bosco wahise asimburwa na Itangishaka Blaise utaherukaga mu kibuga.
Ibintu byongeye kuba bibi kuri iyi kipe, ku munota wa 72 ubwo Mugiraneza Frodouard yatsindiraga Kiyovu Sports igitego cyo kwishyura nyuma y’aho abakinnyi b’iyi kipe babanje gutera imipira itatu mu izamu ariko Ishimwe Pierre akababera ibamba.
Burya ngo ntawe ukira asongwa, kuko nyuma yo gutsindwa igitego, umunyezamu wa APR FC, yahise avunika asimburwa na mugenzi we, Mutabaruka Aléxandre.
Mu minota yakurikiye, umukino waranzwe n’amahane menshi ndetse yashoboraga no gutuma hari umukinnyi werekwa ikarita y’umutuku ariko abasifuzi barabyirinda.
Ku munota wa 84, Kwitonda Alain yongeye kubonera ikipe y’Ingabo igitego cya Kabiri ariko umusifuzi wo ku ruhande, Ishimwe Didier avuga ko cyatsinzwe habanje kubaho kurarira maze kirangwa.
Nyuma yo kwangirwa igitego, abakinnyi ba APR FC bahise birunda kuri uwo musifuzi ndetse Bonheur amukozaho umutwe agaragaza ko atishimiye imisifurire ariko Nkinzingabo wasifuye amwereka ikarita y’umuhondo.
Umukino warangiye amakipe yombi anganyije, igitego 1-1. Kunganya biciye mu bitego kuri Kiyovu Sports ni inyungu kubera igitego cyo hanze.
Umukino wo kwishyura uteganyijwe ku Cyumweru tariki 14 Gicurasi 2023.
Ubdi mukino wa 1/2 wabaye, ni uwo Mukura VS yatsinzwemo ibitego 3-2 na Rayon Sports kuri Stade Mpuzamahanga ya Huye.
Ababanjemo ku mpande zombi:
APR FC XI: Ishimwe Pierre, Ombolenga Fitina, Ndayishimiye Dieudonne, Ishimwe Christian, Ruboneka Bosco, Mugisha Gilbert, Bizimana Yannick, Nshuti Innocent, Kwitonda Alain, Yunussu, Bonheur.
Kiyovu Sports XI: Kimenyi Yves, Ndayishimiye Thierry, Nsabimana Aimable, Iracyadukunda Eric, Serumogo Ally, Mugiraneza Frodouard, Nshimirimana Ismaël Pichu, Bigirimana Abedi, Erisa Ssekisambu, Riyad Nordien, Iracyadukunda Bertrand.
UMUSEKE.RW
