Mu gihe habura amasaha make ngo ikipe ya Rayon Sports yakire Gorilla FC mu mukino w’umunsi wa 28 wa shampiyona, uyu mukino wavanywe i Muhanga uzanwa kuri Kigali Péle Stadium.
Guhera uyu wa Gatandatu tariki 6 Gicurasi 2023, haraba hakinwa imikino y’umunsi wa 28 ya shampiyona y’Icyiciro cya Mbere mu Rwanda.
Umwe mu mikino ihanzwe amaso, ni uzahuza ikipe ya Rayon Sports na Gorilla FC ku Cyumweru tariki 7 Gicurasi 2023.
Ishyirahamwe Nyarwanda ry’Umupira w’Amaguru, Ferwafa, ryamenyesheje ubuyobozi bwa Rayon Sports ko izawakirira kuri Kigali Péle Stadium aho kuba kuri Stade Régional ya Muhanga nk’uko byari biteganyijwe.
Aganira na UMUSEKE Umunyamabanga Mukuru wa Rayon Sports, Namenye Patrick, yaciye amarenga ko iyi nkuru ari impamo.
Ati “Dutegereje official letter ariko birasa nibishohoka.”
Undi mukino iyi kipe iheruka kwakirira kuri iyi Stade, ni uwo yatsinzemo Police FC ibitego 3-2 muri 1/4 cy’Igikombe cy’Amahoro.
Ikipe ya rubanda iri ku mwanya wa Kabiri n’amanota 55, ikarushwa abiri na Kiyovu Sports ya Mbere.
UMUSEKE.RW