Mu Murenge wa Ruvune uhana imbibi n’akarere ka Gatsibo, mu gitondo cyo kuri uyu wa gatatu tariki ya 5 Nyakanga 2023 ahagana saa kumi n’ebyiri za mu gitondo,hagaragaye umurambo w’umukobwa utaramenyekana imyirondoro wishwe atemeshejwe umuhoro nk’uko ubuyobozi bubitangaza.
Ibi byabereye mu Kagari ka Cyandaro,Umudugudu wa Rugarama mu Karere ka Gicumbi.
Umunyamabanga Nshingwabikorwa w’Umurenge wa Ruvune, BENINGOMA OSCAR , yemereye UMUSEKE ko yasanzwe yishwe ariko hataramenyekana uri inyuma yabyo ndetse n’imyirondoro. ya nyakwigendera itaramenyekana.
Yagize ati “Turacyabikurikirana, ni umuntu wapfuye koko ariko imyirondoro ye ntiturayimenya.Ntituramumenya.”
Yongeyeho ko bikekwa ko yishwe atemeshejwe umuhoro.
“Hano hafi hari umuhoro twabonye ariko iperereza riracyakomeje.Kuko ari ku rugabano rwacu na Gatsibo, nabo muri uyu Murenge bahageze, baracyashakisha imyirondoro ye ntabwo turamumenya.”
Umurambo wa nyakwigendera wari utarajyanwa gukorerwa isuzuma n’inzego zibishinzwe.
UMUSEKE.RW I Gicumbi