CR7 ayoboye abatsinze ibitego byinshi mu makipe y’Ibihugu

Kigenza mu mupira w’amaguru ku Isi, Cristiano Ronaldo ukomoka muri Portugal, ayoboye urutonde rw’abakinnyi bamaze gutsindira amakipe ya bo y’Ibihugu.

Mu mupira w’amaguru umukinnyi yitwa ukomeye iyo hari icyo yafashije ikipe yakiniye bikaba akarusho iyo hari icyo yafashije ikipe y’igihugu ye yaba kuyifasha kwegukana Igikombe icyo ari cyo cyose cyo ku rwego rw’Umugabane cyangwa se ku rwego rw’Isi aho tuba tuvuga Igikombe cy’Isi.

Abakinnyi bamwe na bamwe bagiye bandika amateka yo kuba aribo batsidiye ibitego byinshi amakipe yabo y’ibihugu.

Umuseke wifashishije urutonde rwakozwe n’Impuzamashyirahamwe y’Umupira w’Amaguru ku Isi ( FIFA), ndetse n’Impuzamashyirahamwe y’Umupira w’Amaguru i Burayi ( UEFA) , ku itariki 20 Nyakanga 2023, itegura urutonde rw’abakinnyi 10 batsinze ibitego byinshi mu Ikipe y’Igihugu.

10. Hussein Saeed , uyu mukinnyi wakiniye Ikipe y’Igihugu ya Iran mu mupira w’amaguru yatsindiye Iran ibitego 78 mu mikino 137.

9. Robert Lewandowski : Robert usigaye ukinira ikipe ya FC Barcelona muri Espagne ariko akaba akinira ikipe y’Igihugu ya Pologne, uyu mugabo yatsindiye Pologne ibitego 79 mu mikino 142 amaze kuyikinira ariko haracyari amahirwe ko yazabyongera.

8. Godfrey Chitalu: Godfrey wakiniye ikipe y’Igihugu ya Zambia yayitsindiye ibitego 79 mu mikino 111, bimugira umukinnyi wa 8 watsindiye ikipe y’Igihugu ibitego byinshi ku Isi.

7. Ali Mabkhout: Uyu mukinnyi ukomoka muri Leta Zunze Ubumwe za Abarabu ndetse akaba ari nacyo gihugu yakiniye, yatsinze ibitego 81 mu mikino 109.

6. Ferenc Puskás: Puskás Umunya- Hongiriya, ni umukinnyi wa 6 ku Isi mu batsidiye ibitego byinshi ikipe y’Igihugu ye kuko yatsinze ibitego 84 mu mikino 89.

- Advertisement -

5. Sunil Chhetri: Umuhinde waconze ruhago mu bihe byashije yatsinze ibitego 87 mu mikino 137.

4. Mokhtar Dahari: Umunya-Malaysia yatsinze ibitego 89 mu mikino 142 yakiniye ikipe ye ya Malaysia.

3. Lionel Messi: Kabuhariwe mu mupira w’amaguru usigaye ukinira ikipe ya Inter Miami muri Leta Zunze Ubumwe za Amerika ariko akaba akinira ikipe y’Igihugu ya Argentina, uyu mukinnyi amaze gutsinda ibitego 103 mu mikino 175.

2. Ali Daei: Uyu mukinnyi wakiniye Ikipe y’Igihugu ya Iran yakinnye imikino 148 atsindamo ibitego 109.

1. Cristiano Ronaldo: Ku mwanya wa mbere w’abakinnyi batsidiye ikipe y’Igihugu ibitego byinshi mu mateka, ku mwanya wa mbere haza Umunya-Portugal, Cristiano Ronaldo umaze gutsinda ibitego 123 mu ikipe y’Igihugu mu mikino 200. Ni ibintu bitarakorwa n’undi wese ku Isi.