Nshimiyimana Fidèle uri mu kigero cy’imyaka isaga 50 y’amavuko yavuye i Kigali ashaka kwerekeza mu Ntara y’Amajyepfo, yambutse ikiraro cya Nyabarongo agonga ibyuma biri hafi y’Umuhanda ahita apfa.
Umuvugizi wa Polisi mu Ntara y’Amajyepfo, SP Habiyaremye Emmanuel yemeje ayo makuru abwira UMUSEKE ko Nshimiyimana Fidèle yakoreye impanuka mu muhanda mugari wa Kaburimbo uherereye mu Mudugudu wa Kibaya, Akagari ka Ruyenzi, Umurenge wa Runda mu Karere ka Kamonyi ahagana saa saba z’amanywa.
SP Habiyaremye avuga ko uyu mugabo yari atwaye moto ifite plaque ARG 484 D arenga umuhanda ahita yitaba Imana.
Yavuze ko iyi mpanuka yatewe nuko nyirayo yayoboye nabi afite n’umuvuduko ukabije ahita agonga ibyuma byo ku muhanda.
Ati “Uwari uyitwaye yahasize ubuzima uwo yari ahetse arakomereka byoroshye”
Umurambo wa Nyakwigendera wajyanywe mu Bitaro bya Polisi Kacyiru kugira ngo ukorerwe isuzuma, naho uwakomeretse akaba arimo kwitabwaho mu Bitaro bya Nyarugenge.
Nshimiyimana Fidèle asize Umugore n’abana 6, abo bafitanye isano babwiye UMUSEKE ko Nyakwigendera yakomokaga mu Karere ka Nyanza.
MUHIZI ELISÉE /UMUSEKE.RW
