Umuyobozi wa Kiyovu Sports Ltd, Mvukiyehe Juvénal, yongeye kwibutsa abakunzi b’Urucaca ko batigeze baba hafi y’ikipe ya bo uko ku buryo yashoboraga kwegukana igikombe cya shampiyona mu myaka ibiri ishize.
Mu myaka ibiri y’imikino ishize, 2020-2021 na 2021-2022, ikipe ya Kiyovu Sports yakojeje imitwe y’intoki ku gikombe cya shampiyona ariko ikibura mu mpera za shampiyona igitwawe na APR FC.
Mu byakomye mu nkokora Urucaca, hajemo amikoro kuko hari igihe cyageze abakinnyi ndetse n’abandi bakozi b’iyi kipe, batinda guhembwa ndetse imikino imwe bakajya kuyikina baseta ibirenge.
Ubwo yari mu kiganiro Urubuga rw’Imikino cya Radio, umuyobozi wa Kiyovu Sports Ltd, Mvukiyehe Juvénal yavuze ko abakunzi b’iyi kipe yo ku Mumena batigeze bayiba hafi mu mikoro uko byari bikwiye.
Ati “Amafaranga Abanyamuryango ba Kiyovu Sports batangaga, ntabwo yari afite ubushobozi bwo gutunga ikipe icyumweru.”
Ibi yongeye kubivuga, nyuma y’uko mu Nteko rusange iheruka guhuza abanyamuryango ba Kiyovu Sports, Mvukiyehe na bwo yari yabanenze agaragaza ko batigeze bagaragara mu bikorwa by’ikipe uko bikwiye.
Icyo gihe uyu muyobozi yavuze ko, byageze aho ubuyobozi busaba abanyamuryango kujya buri wese atanga byibura ibihumbi 5 Frw byo gutegura buri mukino ariko na byo bigera aho byanga. Urucaca rufite amanota ane mu mikino itatu ya shampiyona imaze gukinwa, nyuma yo gutsinda umukino umwe, ikanganya umwe ikanatsindwa undi.
HABIMANA SADI/UMUSEKE.RW
