Mu mikino y’umunsi wa Mbere ya shampiyona y’Abagore y’Icyiciro cya Kabiri, ikipe ya Forever Women Football Club na Youvia Women Football Club, zatangiye zitwara neza.
Ku wa Gatandatu tariki ya 14 Ukwakira 2023, habaye imikino y’umunsi wa Mbere wa shampiyona y’Abagore y’icyiciro cya Kabiri mu itsinda rya Kabiri.
Forever WFC yari yakiriye Imanzi WFC, yayitsinze ibitego 11-0, mu gihe Youvia WFC na yo yanyagiye AS Kabuye WFC ibitego 7-0.
Undi mukino wagaragayemo ibitego byinshi, ni uwo APR WFC yanyagiyemo UR CMHS ibitego 19-0, Tiger WFC yo itsinda Gatsibo WFC igitego 1-0. Bisobanuye ko mu mikino ine yabaye, habonetsemo ibitego 38.
N’ubwo iyi shampiyona y’Icyiciro cya Kabiri ikiri mu ntangiriro, ariko amakipe arimo Forever na Youvia agaragaza ko uyu mwaka yiteguye neza ndetse afite intego yo kuza mu Cyiciro cya Mbere.
HABIMANA SADI/UMUSEKE.RW
