Umunyezamu w’Ikipe y’Igihugu Amavubi na AS Kigali, Kimenyi Yves na Miss Uwase Muyango Claudine bahamije isezerano ryo kubana nk’umugabo n’umugore imbere y’amategeko.
Uyu muhango wabereye mu Murenge wa Nyarugenge mu Mujyi wa Kigali, kuri uyu wa Kane tariki 4 Mutarama 2024.
Kimenyi na Muyango bageze ku biro by’Umujyi wa Kigali, ahari Umurenge wa Nyarugenge, basezeraniyemo, mu masaha y’igicamunsi. Bari mu modoka yo mu bwoko bwa V8 ifite ibara ry’umukara.
Mu bari baherekeje Kimenyi Yves, harimo mushiki we, umubyeyi we, inshuti n’abo bakinana mu kipe ya AS Kigali.
Miss Muyango Claudine n’uyu munyezamu, ubwo binjiraga mu cyumba basezeraniyemo bahawe impundu n’ababyeyi babaherekeje bari buzuye umunezero.
Umuyobozi ushinzwe Irangamimerere mu Murenge wa Nyarugenge, Murekatete Patricie, wasezeranyije Kimenyi na Muyango yabanje kubigisha uko bagomba kwitwara, anabaha impanuro zo gukomeza kuganira kuko ari ryo shingiro ryo kubaka urugo.
Yibukije Muyango ko afite inshingano zo kubaha no kugandukira Kimenyi. Yagize ati “Ukurusha umugore akurusha urugo.’’
Murekatete Patricie yabibukije ko gucana inyuma, guta urugo amezi 12, kutita ku nshingano z’urugo biri mu bishobora gutuma bahana gatanya.
Yahise asaba Uwase Muyango Claudine na Kimenyi Yves kwegera ibendera ry’igihugu bagasezerana. Basoje gutanga indahiro zabo, Murekatete yegereye ibendera ry’igihugu ahamya isezerano ry’aba bombi ryo kubana nk’umugabo n’umugore.
- Advertisement -
Muyango Claudine na Kimenyi Yves batangiye kuvugwa mu rukundo muri Kanama yo mu 2019. Aba bombi basanzwe babana ndetse ku wa 21 Kanama 2021, bibarutse imfura yitwa Kimenyi Miguel Yannis.
Ku itariki 13 Ukwakira 2019, Muyango yateguriye isabukuru Kimenyi Yves anamushimira urukundo yamukunze. Kimenyi yambitse impeta ishimangira urwo akunda Muyango ku itariki 28 Gashyantare 2021.
Uyu mugore yakorewe ibirori byo kwitegura ubukwe ‘Bachelorettes party’ ku wa 16 Ukuboza 2023, byitabiriwe n’abantu b’ingeri zitandukanye biganjemo inshuti z’uyu mugore.
Muyango Claudine yabaye Nyampinga uberwa n’Amafoto muri Miss Rwanda 2019 mu gihe Kimenyi Yves ari Umunyezamu w’Ikipe y’Igihugu “Amavubi” na AS Kigali aheruka no kugiriramo imvune. Yananyuze mu makipe atandukanye arimo APR FC, Rayon Sports na Kiyovu Sports.
HABIMANA SADI/UMUSEKE.RW