Ubuyobozi bw’Ikigo gishinzwe indege za gisivile muri Tanzania, bwatangaje ko bwahagaritse ingendo Sosiyete ya Kenya ikora ubwikorezi bwo mu kirere, Kenya Airways ziva Nairobi zijya Dar es salaam.
Iki kigo kivuga ko iki cyemezo kigomba guhita gishyirwa mu bikorwa kuva ku wa 22 Mutarama 2024.
Kenya Airways yari isanzwe ikora Ingendo 33 mu cyumweru ziva mu murwa mukuru, Nairobi zijya i Dar es Salaam.
Iki cyemezo gifashwe nyuma yaho Kenya ikumiriye nayo indege itwara imizigo ya Air Tanzania,( (ATCL), yakoraga ingendo ziva i Nairobi zijya mu bindi bihugu.
Tanzania yavuze ko iki cyemezo cya Kenya gihonyora ibigenwa n’amasezerano yo gufunguranira ikirere ibihugu byombi byashyizeho umukono mu 2016.
Ibihumbi by’abaturage b’ibihugu byombi byakoreshaga iyi ndege bakora ubucruzi,ubukerarugendo ndetse no gusurana kw’imiryango.
Muri Kanama 2020, Tanzania yakumiriye indege za Kenya nyuma yaho iki gihugu gikuye ku rutonde Tanzania mu bihugu abaturage bayo bashobora kujyamo batabanje kubahiriza amategeko yo kwishyira mu kato.
Ibi byakuruye umwuka mubi hagati y’ibihugu byombi.
TUYISHIMIRE RAYMOND/UMUSEKE.RW