Nyuma yo gutsindwa n’ikipe ya Gasogi United mu mukino w’umunsi wa 16 wa shampiyona, muri Rayon Sports haravugwamo umwuka mubi ndetse no kwirukanwa kwa Muhammed Wade utoza iyi kipe.
Ku wa Gatanu tariki ya 12 Mutarama 2024, ni bwo hasubukuwe imikino yo kwishyura ya shampiyona y’icyiciro cya mbere mu Rwanda y’umupira w’amaguru. Iyi mikino yabimburiwe n’umukino w’umunsi wa 16, Rayon Sports yatsinzwemo na Gasogi United ibitego 2-1.
Iyi kipe iyoborwa na Kakooza Nkuriza Charles [KNC], yatsindiwe na Kabanda Iradukunda Serge watsinze ibitego byombi, mu gihe iyo mu Nzove yatsindiwe na Hértier Nzinga Luvumbu.
Nyuma yo gutakaza uyu mukino, muri Rayon Sports hasigayemo umwuka mubi wo kwitana ba mwana ku byatumye batakaza uyu mukino. Ikirenze kuri ibi kandi, haravugwa iyirukanwa ry’umutoza Muhammed Wade utoza iyi kipe nk’umutoza mukuru.
Amakuru UMUSEKE wamenye ukesha abari hafi y’ubuyobozi bw’iyi kipe ikunzwe na benshi mu Rwanda, avuga ko icyemezo cyo kwirukana uyu mutoza gishobora kuba cyafashwe ariko kitari guhurizwaho na Komite Nyobozi yose.
Rayon Sports yagumye ku mwanya wa Kane n’amanota 27, mu gihe Gasogi United yo yahise ifata umwanya wa Karindwi n’amanota 21.
HABIMANA SADI/UMUSEKE.RW