Nyuma yo kwegukana igikombe cya shampiyona itararangira, ikipe ya Rayon Sports Women Football Club, yagishyikirijwe kuri uyu wa Gatandatu.
Umuhango wo guhabwa iki gikombe, wabanjirijwe n’umukino w’umunsi wa nyuma wa shampiyona y’Abagore, wahuje Rayon Sports WFC na Fatima WFC, wabereye mu Nzove.
Gikundiro yabanje gutsinda uyu mukino ku ntsinzi y’ibitego 5-0 byatsinzwe na Marry Chavinda watsinze bibiri, Mukandayisenga Jeaninine uzwi nka ‘Kaboy’ watsinze kimwe, Nibagwire Libellée watsinze kimwe na Uwitonze Nyirarukundo watsinze kimwe.
Abayobozi b’Ishyirahamwe ry’Umupira w’Amaguru mu Rwanda, Ferwafa, bari baje kureba uyu mukino no kwitabira umuhango wo gutanga igikombe.
Aba barimo Visi Perezida wa Mbere Ushinzwe Imari, Habyarimana Marcel, Visi Perezida wa Kabiri Ushinzwe Tekinike, Mugisha Richard, Umuyobozi wa Komisiyo Ishinzwe Iterambere rya ruhago y’Abagore muri Ferwafa, Munyankaka Ancille, Perezida wa Rayon Sports, Rtd Capt, Uwayezu Jean Fidèle n’abandi.
Nyuma yo gusoza umukino, Rayon Sports WFC, imaze kunyagira Fatima WFC, yahise ishyikirizwa igikombe, imidari ya Zahabu na miliyoni 16 Frw.
Kwegukana igikombe cya shampiyona, birasobanura ko iyi kipe yo mu Nzove ari yo izahagararira u Rwanda mu mikino Nyafurika yo gushaka itike yo kuzajya muri CAF Women Champions League.
Iyi kipe kandi iracyari mu gikombe cy’Amahoro, aho igeze muri 1/4, ikaba izakina na APAER WFC mu mukino wo kwishyura uzabera mu Nzove ku wa Gatatu tariki ya 3 Mata 2024.
HABIMANA SADI/UMUSEKE.RW
