Ubushinjacyaha bw u Rwanda kuri uyu wa Kane tariki ya 23 Gicurasi 2024,bwasabiye Barikana Eugène wahoze mu Nteko Ishingamategeko umutwe w’Abadepite , gufungwa imyaka ibiri nyuma yo gusanganwa intwaro iwe mu rugo.
Mu Rukiko rw’Ibanze rwa Nyarugenge niho habereye iburanisha , aho Barikana Eugène, yaburanye yemera icyaha agasaba gukurirwaho ibihano.
Biteganyijwe ko icyemezo cy’Urukiko kizasomwa ku wa Gatatu tariki ya 29 Gicurasi 2024.
Urwego rw’Ubugenzacyaha tariki 11 Gicurasi 2024, nibwo rwafunze Barikana nyuma yo kwegura mu Nteko Ishinga amategeko nk’Umudepite.
RIB ivuga ko yari akurikiranyweho gutunga intwaro mu buryo bunyuranyije n’amategeko.
Barikana bamusanganye grenade imwe, na magazine imwe y’imbunda yo mu bwoko bwa AK 47 (SMG).
Uyu mugabo ngo yabwiye abagenzacyaha ba RIB ko “Intwaro yazitunze akibana n’abasirikare akibagirwa kuzisubiza.”
Naramuka agihamijwe n’Urukiko ashobora guhanishwa igifungo kuva ku mwaka umwe ariko kitarenze imyaka ibiri n’ihazabu y’amafaranga y’u Rwanda kuva kuri miliyoni imwe kuge ra kuri miliyoni ebyiri cyangwa kimwe gusa muri ibyo bihano.
Barikana Eugene wabaye Depite iwe bahasanze “Grenade”
- Advertisement -
UMUSEKE.RW