Abarundi babiri baba mu mutwe w’urubyiruko rushamikiye ku ishyaka CNDD-FDD riri ku butegetsi bw’u Burundi uzwi nk’Imbonerakure, bishe umurundi witwa Nsabimana Philippe, wageragezaga kuza mu Rwanda.
Ikinyamakuru SOS Medias Burundi kivuga ko Nsabimana w’imyaka 22 yishwe ku wa Gatanu tariki ya 10 Gicurasi 2024, ahagana saa munani (14h00), ubwo yashakaga kwambuka umugezi w’Akanyaru kugira ngo ajye kurema isoko riherereye mu Murenge wa Cyahinda, mu Karere ka Nyaruguru.
Uyu musore wari muri Komini Kabarore mu Ntara ya Kayanza, yafashwe n’izi Mbonerakure zarindaga umutekano, ziramukubita.
Umwe mu baturage wabonye ibyabaye, avuga ko “Ni Imbonerakure zarindaga aka gace zabikoze. “
Uyu yongeraho ko izi mbonerakure zamushinze icyuma mu gutwi ari nacyo cyatumye ashiramo umwuka nkuko SOS Media Burundi ibitangaza.
UMUSEKE.RW