Urukiko rwo muri Guinea rwakatiye Capt Moussa Dadis Camara wahoze ari umutegetsi w’iki gihugu gufungwa imyaka 20 kubera ibyaba byibasiye ikiremwamuntu.
Uyu mugabo yahamijwe ibyaha byo kuba inyuma y’ubwicanyi bwakozwe n’igisirikare bugahitana abantu basaga 156 ndetse n’abagore benshi bagafatirwa ku ngufu muri Stade i Conakry.
Capt Camara yari akurikiranweho kuba ari we watanze amabwiriza ku basirikare bakoze ayo mahano mu mwaka wa 2009.
Uyu wahoze ari umutegetsi wa gisirikare ntiyahwemye guhakanira Urukiko ko ibyo ashinjwa nta sano afitanye nabyo ko bishingiye kuri Politiki nk’uko binashimangirwa n’Umwuganizi we mu mategeko.
Muri 2008 nibwo Capt Dadis Camara yafashe ubutegetsi ahiritse Perezida Lansana Conté wari umaze igihe kinini apfuye.
Ni mu gihe Capt Camara ufatwa nk’umunyagitugu yayoboye Guinea kugeza ku wa 15 Mutarama 2010.
Uyu mugabo wari warahungiye muri Burkina Faso akaza gukurwayo muri Nzeri 2022 kugira ngo akurikiranwe n’ubutabera, yavuze kenshi ko ari umwere.
We na bagenzi be bagera kuri barindwi bahamwe n’ibyaha byo kwica, ihohotera rishingiye ku gitsina, iyicarubozo no gushimuta abantu bahanishwa gufungwa imyaka 20 ni mu gihe batatu bagizwe abere.
Guinea Conakry kuri ubu iyobowe na Colonel Mamadou Doumbouya kuva igisirikare cyahirika ubutegetsi bwa Alpha Conde muri Nzeri 2021.
- Advertisement -
MURERWA DIANE / UMUSEKE.RW
