Ikipe ya Marines FC, yatsinze Kiyovu Sports ibitego 4-2 mu mukino w’umunsi wa Gatandatu wa shampiyona wabereye kuri Stade Umuganda kuri iki Cyumweru.
Ni umukino watangiye Saa Cyenda z’amanywa, ubera kuri Stade Umuganda iherereye mu Karere ka Rubavu. Kiyovu Sports yari yagiye gukina uyu mukino idafite bamwe mu bakinnyi barimo Ndizeye Eric na Mbonyingabo Regis. Aba bombi bamaze iminsi bafite ibibazo by’imvune.
Ikipe ya Marines FC izwiho kugora amakipe akomeye, yongeye kubikorera kuri Stade yakiriraho. Ibifashijwemo na Ndombe watsinze igitego ku munota 21, Mubatrakh wagitsinze ku munota wa 55 na Ebenezer watsinze bibiri ku munota wa 74 n’uwa 86, yatsinze Kiyovu Sports ibitego 4-2.
Urucaca rukomeje kugira ibihe bibi, rwahushije penaliti muri uyu mukino yahushijwe na Ishimwe Kevin wayikubitse igiti cy’izamu. Umukino warangiye iyi kipe yo ku Mumena yongeye gutsindwa, uba umukino wa Kane wikurikiranya. Kiyovu ifite amanota atatu kuri 15 imaze gukinira.
UMUSEKE.RW
