Perezida wa Repubulika, Paul Kagame yaganiriye n’Umunyamabanga wa Leta Zunze Ubumwe za Amerika ushinzwe Ububanyi n’Amahanga, Marco Rubio, ku bibazo by’umutekano mucye muri Congo, bemeranya ko impande zihanganye zahagarika imirwano.
Umukuru w’Igihugu abinyujije ku rubuga rwa X, kuri uyu wa kabiri tariki ya 28 Mutarama 2025, yavuze ko yagiranye ikiganiro n’Umunyamabanga wa Leta Zunze Ubumwe za Amerika ushinzwe Ububanyi n’Amahanga ku bijyanye n’ibibazo by’umutekano mucye uri muri Repubulika Iharanira Demokarasi ya Congo.
Yagize ati “Nagiranye ikiganiro cyubaka n’Umunyamabanga wa Leta [muri Minisiteri y’Ububanyi n’Amahanga ya Amerika] Rubio, ku byerekeranye n’ihagarikwa ry’imirwano mu Burasirazuba bwa RDC no gushakira umuti umuzi w’ayo makimbirane, rimwe na rizima.”
Ibiro bya Amerika bishinzwe ububanyi n’amahanga na byo byasohoye itangazo rivuga ko ushinzwe Ububanyi n’Amahanga, Marco Rubio, yavuganye kuri telefoni na Perezida Paul Kagame w’u Rwanda.
Byagize biti “Umunyamabanga wa Leta Zunze Ubumwe za Amerika ushinzwe Ububanyi n’Amahanga, Marco Rubio,yavuganye na Perezida w’u Rwanda Paul Kagame,Rubio yagaragaje ko Amerika ihangayikishijwe n’imirwano iri mu Burasirazuba bwa Congo no kuba umujyi wa Goma warafashwe n’umutwe wa M23. Rubio yasabye ko imirwano ihagarara ako kanya kandi impande zihanganye zikareka kuvogera ubusugire bw’igihugu.”
Rubio kimwe na Perezida KAGAME bemeranyije ko ikibazo kigomba gukemuka giherewe mu mizi.
Hagati aho Umudepite uyoboye Komisiyo y’Ububanyi n’Amahanga mu Nteko Ishinga Amategeko ya Leta Zunze Ubumw za Amerika, Michael McCaul, yavuze ko anenga kuba Biden atarakurikiranye ishyirwa mu bikorwa ry’amasezerano ya Luanda.
Yagize ati“ Ndi kumwe na Marco Rubio ndetse n’ubuyobozi bwa Perezida Trump mu kunenga bikomeye M23 ishyigikiwe n’u Rwanda yafashe Goma ndetse n’a baturage ba Congo.”
Yakomeje ati “Imirwano yo mu Burasirazuba bwa Congo, ni ibigaragaza ugutsindwa ku ubuyobozi bwa Biden butakurkiranye ishyirwa mu ry’ amasezerano ya Luanda.”
- Advertisement -
Michael McCaul, avuga ko byatumye habaho guhutaza bikomeye uburenganzira bwa kiremwa muntu,abantu miliyoni z’abantu barahunga bava mu byabo,amakimbirane mu karere .
Asanga kandi impande zombi zigomba kwicara ku meza y’ibiganiro zigasha uko iki kibazo kirangira.
Uyu kandi avuga ko atashimishijwe n’uburyo Ambasade ya Amerika, abanye-Congo bayiteye, bigaragambya bityo ko bitagomba kwihanganirwa.
Ati “ Nubwo Amerika iri kumwe na Congo mu gusaba ko M23 yahagarika imirwano, Gutera Amabasade ya Amerika n’abantu bayo ntabwo bigomba kwihanganirwa.”
Amahanga akomeje gusaba ko M23 ndetse n’ingabo za Congo zihagarika imirwano hagashakwa igisubizo kirambye binyuze mu biganiro.
Uyu mutwe uvuga ko nawo udashobora gutuza mu gihe Leta ya Congo idakozwa ibiganiro nawo.
Leta ya Congo nayo yakomeje gushimangira ko itazigera iganira n’uyu mutwe yita ko ari uw’iterabwoba.
UMUSEKE.RW