RDF ni ingabo z’igihugu ntabwo ari “inyeshyamba” – Kagame akosora Ramaphosa

Perezida wa Repubulika Paul Kagame yakosoye Perezida wa Afurika y’Epfo, Cyril Ramaphosa wavuze ko ingabo z’u Rwanda ari “militia” (inyeshyamba).

Perezida Paul Kagame yavuze ko yagiranye na Perezida Ramaphosa ibiganiro bibiri baganira ku biri kuba mu Burasirazuba bwa Congo, harimo n’icyo bagiranye ku wa Gatatu.

Yavuze ko ibyo baganiriye abayobozi bageze mu binyamakuru byo muri Africa y’Epfo harimo na Perezida Ramaphosa bahindura imvugo, banakoresha amagambo arimo kwibasira ku bushake n’ibinyoma.

Perezida Kagame yavuze koniba ibyaganiriwe bigera mu biri butangarizwe abantu byahindutse bigaragaza uko ibibazo bihari birimo no kwitabwaho.

Mu byo yakosoye Perezida Ramaphosa, harimo kuba yavuze ko ingabo z’u Rwanda (The Rwanda Defence Force) ari “militia” (inyeshyamba), Perezida Paul Kagame yamubwiye ko atari byo ko ari ingabo z’igihugu cy’u Rwanda.

Perezida Kagame yanavuze ko ingabo za Sadc zagiye muri Congo atari mu buryo bwo kubungabunga amahoro, ko ahubwo zagiyeyo zifite gahunda yo kurwana ku ruhande rwa Leta ya Congo, ikorana ikanaha intwaro umutwe wa  FDLR ugambiriye inabi ku Rwanda, ndetse izo ngabo zanagambiriye guhungabanya u Rwanda binyuze mu ntambara.

Izo ngabo za SADC zitwa SAMIDRC, Perezida Kagame avuga ko zirukanye ingabo z’umuryango wa Africa y’Iburasirazuba zo ahubwo zari zigambiriye amahoro, bituma izo ngabo za Sadc ziburizamo gahunda y’ibiganiro.

Perezida Kagame yavuze ko mu biganiro yagiranye na Cyril Ramaphosa hatarimo ijambo “warning” (guha gasopo) mu buryo ubwo ari bwo bwose.

Ati “Kereka niba yabivuze mu rurimi rwabo simbashe kubyumva. Yasabye ko twafasha kugira ngo ingabo za Africa y’Epfo zibone amashanyarazi, ibiribwa, n’amazi, kandi ibyo tuzafasha kubivuga.”

Perezida Ramaphosa ikindi yabwiye Perezida Kagame ni uko umutwe wa M23 utishe abasirikare ba Africa y’Epfo ahubwo “ngo bishwe na, FARDC (ingabo za Congo).”

Mu gusoza ubutumwa bwe, Perezida Kagame yavuze ko Africa y’Epfo igihe yaba ishaka kugira umusanzu izana mu bisubizo binyuze mu mahoro byaba ari byiza cyane, ariko ko Africa y’Epfo idakwiye kuba mu mwanya wo kuba indorerezi z’amahoro (peacemaker) cyangwa umuhuza (mediator).

Perezida Kagame ati “Niba Africa y’Epfo bazahitamo guhangana, u Rwanda ruzakemura ikibazo muri ubwo buryo.”

Perezida Kagame mu ijambo yabwiye abakuru b’ibihugu bya Africa y’iburasirazuba yibajije impamvu bemeye ko ingabo z’uyu muryango ziva muri Congo zigasimbuzwa iza SADC kubera gusa ko ari ko Perezida Felix Tshisekedi abyifuza.

VIDEO

UMUSEKE.RW