Umunyezamu wa mbere wa Rayon Sports, Khadime N’diaye, yasabye imbabazi abakunzi ba Rayon Sports n’abakunzi ba ruhago mu Rwanda muri rusange, ku bw’amakosa aherutse gukorera mu irushanwa ry’Igikombe cy’Intwari bikanamuviramo kwereka ikarita itukura.
Ku wa 28 Mutarama 2025, nib wo hatangiye irushanwa ry’Igikombe cy’Intwari mu mupira w’amaguru. Amakipe ya Rayon Sports, Police FC, APR FC na AS Kigali, ni yo yarikinnye kuko ari yo ane ya mbere ayoboye urutond rwa shampiyona ubu.
Mu mukino ikipe y’Abashinzwe Umutekano yasezereyemo Gikundiro kuri penaliti 3-1 nyuma yo kunganya igitego 1-1 mu minota 90 y’umukino, umunyezamu ukomoka muri Sénégal, Khadime N’diaye, yeretswe ikarita itukura nyuma yo gufata umupira akawurekura akajya gusagarira Byiringiro Lague.
Uyu munyezamu yagaragaza ko uyu mukinnyi ari we wabanje kumukinira nabi, ariko uwari umusifuzi w’uyu mukino, amwereka ikarita itukura. Ibi Khadime yakoze, byanenzwe na benshi barebye uyu mukino ndetse bamwe mu ba-Rayons bamusabira ko ubuyobozi bwamufatira ibindi bihano.
Aganira n’itsinda rishinzwe Itangazamakuru n’Itumanaho muri Rayon Sports, N’diaye, yasabye imbabazi abakunzi ba Rayon Sports ndetse n’abakunzi ba ruhago muri rusange.
Ati “Ndasaba imbabazi abakunzi, abayobozi ba Rayon Sports n’ikipe yanjye muri rusange. Nakoze ikosa ku mukino wa Police FC. Nzi ko banshyigikira cyane. Nanjye ngomba gukora ibyiza kurushaho.”
Gikundiro ikomeje imyitozo yitegura imikino yo kwishyura ya shampiyona ndetse n’iy’Igikombe cy’Amahoro.
UMUSEKE.RW
