Perezida wa Repubulika Iharanira Demokarasi ya Congo, Félix Tshisekedi, yazamuye mu ntera Général de Brigade Somo Kakule Evariste, ahabwa ipeti rya Général Major, amuha inshingano zo kuyobora Intara ya Kivu y’ Amajyaruguru.
Uyu asimbuye Général Major Peter Cirimwami Nkuba wishwe na M23 tariki 24 Mutarama 2025 mu mirwano ingabo za leta zari ziihanganyemo n’uyu mutwe.
Général Major Somo Kakule Evariste yari asanzwe ari umukuru wa Brigade ya 31 y’ingabo zo mu mujyi wa Kindu mu ntara ya Maniema ihana imbibi na Kivu ya Ruguru.
Yabarizwaga mu ngabo zidasanzwe za FARDC ndetse yarwanye na M23 mu mirwano yaberaga mu bice bya Kanyabayonga.
Nyuma y’ifatwa rya Goma, M23 ubu iragenzura igice gisaga kimwe cya gatatu cy’intara ya Kivu ya Ruguru, ibice binini bya teritwari za Walikale, Lubero na Beni n’imijyi yaho ntabwo harafatwa na M23.
Muri Goma habereye imirwano ikaze mu minsi ibiri ishize ,harumvikana agahenge ndetse n’ingabo za leta zemeye gutsindwa zimwe zahungiye mu Rwanda.
Hari amakuru avuga kandi ko abacancuro b’abazungu nabo bari ku ruhande rwa leta , bagiye gusubira mu bihugu byabo, baciye ku mupaka uhuza Congo n’u Rwanda.
Ibihugu nka Leta Zunze Ubumwe za Amerika, Ubudage, Ubwongereza , Ububiligi n’ibindi byasabye, ko mimpande zihanganye zahagarika imirwano hagakurikizwa ibiganiro bya Luanda.
UMUSEKE.RW