Samuel Gueulette ukinira Ikipe y’Igihugu ‘Amavubi’ ari mu bakinnyi bahataniye igihembo cy’Umukinnyi Mwiza wa Mutarama 2025 muri RAAL La Louvière yo mu Cyiciro cya Kabiri mu Bubiligi.
Uyu mukinnyi ukina hagati mu kibuga ajyana imipira imbere, yatangiye neza uyu mwaka w’imikino 2024-25, ndetse atangira neza by’umwiharika uwa 2025 kuko ubu ari mu bo iyi kipe iri gucungiraho mu kibuga hagati.
Samuel uri ku rutonde rw’abagomba kuvamo uwitwaye neza muri iyi Mutarama, ahanganye n’abarimo Mohamed Guindo, Fadel Goditaka na Djibril Lamego.
Mu 2021, nib wo uyu musore w’imyaka 20, yerekezaga muri RAAL La Louvière ikina muri shampiyona y’icyiciro cya kabiri mu Bubiligi. Uyu yagiyeyo avuye muri KSV Roeselare na yo yo muri iki gihugu.
Mbere yo gutangira guhamagarwa mu ikipe y’Igihugu, Amavubi nkuru, Gueulette yabanje guca mu byiciro bitandukanye nko mu batarengeje 20 na 23.
Kugeza ubu ku munsi wa 18 wa shampiyiona, RAAL La Louvière iri ku mwanya wa gatatu n’amanota 35, irushwa icyenda na S.V. Zulte Waregem ya mbere.
UMUSEKE.RW