Inyeshyamba za M23 zirimo kurwanira mu nkengero z’umujyi wa Goma zaburiye ingabo zo mu bihugu bya Africa y’Amajyepfo, SAMIDRC n’iza MONUSCO ko nizivanga mu mirwano na zo ziraswaho.
Kugeza ubu umutwe wa M23/AFC ukomeje gushushubikanya ingabo za leta ya Congo mu bice bitandukanye, aho wafashe Minova muri Kivu y’Amajyepfo n’uduce twa Lumbishi n’ahandi.
Imirwano yo ku wa Kane yabereye mu nkengero z’umujyi wa Goma, mu misozi ya Kanyamahoro, ndetse no muri Sake aho “bamwe mu bo ku ruhande rwa M23 bemeza ko bahafashe”.
Ku ruhande rw’ingabo za Congo, Guverineri uyoboye gisirikare Intara ya Kivu ya Ruguru, Maj Gen Cirimwami Peter yagaragaye ajya i Mubambiro “bavuga ko bagiye kugaba ibitero byo gusubirana Sake”.
Umuvugizi wa politiki w’umutwe wa AFC/M23 Laurence Kanyuka yavuze ko abatuye umujyi wa Goma “bahangayitse cyanenk’abandi Banye-Congo.”
Ati “AFC/M23 iri mu nzira iza kubabohora, mwitegure kuyakira. Ntimugire ubwoba. AFC/M23 ibazaniye amahoro.”
I Goma bamwe mu baturage bafite ubwoba kimwe n’imiryango itandukanye ihakorera, ndetse hari n’abahungiye mu Rwanda.
Umuvugizi wa M23, yavuze ko mu itangazo basohoye tariki 22/01/2025 babwiye ingabo za SADC (SAMIDRC) na MONUSCO ko batari mu bo barwana.
Ati “Ibimenyetso byose birerekana ko MONUSCO na SAMIDRC bitegura kudutera, ku bw’iyo mpamvu turirwanaho.”
- Advertisement -
M23 irashinja ingabo za leta kurasa mu nkambi mu bice bya Bulenga, muri teritwari ya Minova, ibisasu bigahitana ubuzima bw’abasivile.
Oscar Barinda umuvugizi wungirije wa politiki, wa M23 yavuze ko icyo bashaka ari inzira y’ibiganiro, avuga ko umujyi wa Goma batawugose kugira ngo abahatuye bicwe n’inzara.
Gusa, Perezida Antoine Felix Tshisekedi aherutse kuvuga ko nta na rimwe azaganira na M23 yita umutwe w’iterabwoba.
VIDEO
UMUSEKE.RW
