Kiyovu Sports yariye ilaidi neza

Nyuma yo gutsinda Police FC igitego 1-0, Kiyovu Sports yashije Abayisilamu bayikinira kwizihiza neza umunsi wa ‘Eid al-Fitr.’

Ku Cyumweru tariki ya 30 Werurwe, Saa Cyenda z’amanywa kuri Kigali Pelé Stadium, ni bwo umukino w’umunsi wa 22 wa shampiyona wahuje Kiyovu Sports na Police FC, wari utangiye.

Urucaca, rwari rwakoze impinduka muri 11 babanjemo ubwo rwatsindwaga na Musanze FC mu mukino w’umunsi wa 21 wa shampiyona.

Mugisha Désire ukina mu busatirizi, yari yahaye umwanya Mutunzi Darcy mu gihe Twahirwa Olivier yari yahaye umwanya Ishimwe Kevin.

Ku munota wa Gatanu w’umukino, Rukundo Onesme wari mu izamu rya Police FC, yakuyemo umupira ukomeye wari utewe na Niyonkuru Ramadhan ariko koruneri yari ibonetse ntiyagira icyo itanga.

Urucaca rwagaragazaga ubushake bwo kubona igitego, rwakomeje gukinira ku izamu ry’ikipe y’Abashinzwe Umutekano, bituma abakinnyi ba yo bamwe batangira kugira imvune.

Ku munota wa 27, Bigirimana Abedi na Niyonsaba Eric bagize imvune zatumye basimburwa na Ani Elijah na Nshimiyimana Siméon.

Urucaca rwakomeje kotsa igitutu abo ku Kacyiru, birangira ku munota wa 35, Nsabimana Eric wari mu bwugarizi ataka imvune maze asimburwa na Samuel.

Amakipe yombi yakomeje gucungana, iminota 45 y’igice cya Mbere, irangira ari 0-0.

Bakigaruka mu gice cya Kabiri, Mashami Vincent utoza Police FC, yakuyemo Hakizimana Muhadjiri wasimbuwe na Ngabonziza Pacifique.

Ku munota wa 48, ni bwo Mutunzi Darcy yatsindiye igitego ikipe yo ku Mumena nyuma y’umupira wabanje guhererekanywa imbere y’izamu, maze Abayovu binaga ibicu.

Ikipe y’Igikipolisi itishimiye imisifurire, igitsindwa igitego gakoze impinduka, ikuramo Richard Kilongozi Bazombwa wasimbuwe na Chukwuma wasabwaga kwihutisha imipira igana imbere.

Nyuma yo gutsinda iki gitego, Kiyovu Sports na yo yakoze impinduka ikuramo Mutunzi Darcy na Uwineza Rène, basimbuwe na Twahirwa Olivier na Tabu Tegra Crespo.

Urucaca rwakomeje gucunga igitego cya rwo ari na ko Police FC ikomeza gusatira ariko iminota 90 yaje kurangira ikipe yo ku Mumena yegukanye intsinzi y’igitego 1-0.

Iyi ntsinzi ya Kiyovu Sports, yatumye yuzuza amanota 21 ariko iguma ku mwanya wa 15 aho irushwa ane na Marines FC ya 14.

Mutunzi Darcy ni we wahesheje Urucaca amanota atatu
Nta bwo wari umunsi mwiza kuri Police FC
Zidane ntiyasoje umukino
Serugaba Eric wakiniye Kiyovu Sports, yashimiye abakinnyi ku bwitange bagaragaje

UMUSEKE.RW