Abarwanyi ba AFC/M23 baburiye Ihuriro ry’Ingabo za Guverinoma ya Kinshasa ziri gufata ifoto ziseka mu Mujyi wa Walikale, babibutsa ko nibakora ikosa rito bazota umuriro birukanwe muri uwo Mujyi ubutawugarukamo.
Mu ijoro ryo ku wa 1 rishyira uwa 2 Mata, abarwanyi ba AFC/M23 batangiye kuva mu Mujyi wa Walikale n’inkengero zawo.
Ni ibyakozwe nta kurasana kubayeho, bihabanye n’ibitangazwa na Kinshasa ivuga ko FARDC na Wazalendo ari bo birukanye abo barwanyi muri Walikale.
Kuva kwa AFC/M23 muri Walikale byahaye amahirwe Ihuriro ry’Ingabo za Guverinoma ya RD Congo yo kugaruka muri uyu mujyi, aho bari barirukanywe shishi itabona.
Guhera mu gitondo cyo ku wa 3 Mata, Ingabo za RDC na Wazalendo basakaje ‘selfie’ baseka muri Walikale, bamwe bavuga ko birukanye AFC/M23 ndetse ko n’ahandi iri hose bagomba kuhisubiza.
Ni mu gihe ku mbuga nkoranyambaga, bamwe mu bategetsi n’Abanye-Congo bavuga ko AFC/M23 yokejwe igitutu n’amahanga ndetse n’amasasu ya FARDC ifite ‘morale’ kubera agashahara kiyongereye, maze ikava muri uwo mujyi.
Lawrence Kanyuka, Umuvugizi wa AFC/M23, yavuze ko abarwanyi b’iri huriro bavuye mu Mujyi wa Walikale no mu bice biwukikije mu rwego rwo kubahiriza icyemezo bafashe ku wa 22 Werurwe.
Yamenyesheje Abanye-Congo ko bitandukanye n’ibiri gukwirakwira ku mbuga nkoranyambaga n’ubutegetsi bwa Kinshasa ko birukanwe muri uwomujyi n’amasasu cyangwa ku itegeko ry’undi wese.
Kanyuka yaburiye Ihuriro ry’Ingabo za Leta ya RDC ko nibongera kugaba ibitero, abarwanyi ba AFC/M23 bazasubira muri uwo mujyi.
Ati “Ingabo za Leta ya Kinshasa nizikomeza ubushotoranyi, zikagaba ibitero ku basivili mu bice tugenzura no ku birindiro byacu, iki kimenyetso cy’ubushake kizakurwaho, kandi dusenyere ikibi aho gituruka.”
Biteganyijwe ko ku wa 9 Mata 2025, abarwanyi ba AFC/M23 bazahurira mu biganiro by’imbonankubone n’ubutegetsi bwa Kinshasa, bizabera i Doha muri Qatar.
NDEKEZI JOHNSON / UMUSEKE.RW
