APR FC igiye gukina imikino ibiri ya gishuti yitegura Etoile du Sahel

Ukeneye kwamamaza! Gusobanuza! Gutanga amakuru? Hamagara 0788772818

Ikipe y’Ingabo z’Igihugu ya APR FC igiye gukina imikino ibiri ya gishuti n’amakipe ya Etincelles na Kiyovu Sports yitegura umukino ifitanye na Etoile du Sahel yo muri Tunisia mu guhatanira kujya mu matsinda ya CAF Champions League.

Iyi mikino ya gishuti irabimburirwa n’umukino ubera ku kibuga cy’imyitozo cya APR FC i Shyorongi kuri uyu wa Kabiri, tariki 5 Ukwakira 2021, aho iyi kipe yakira Etincelle yo mu Karere ka Rubavu. Ni umukino uraba ku isaha ya saa cyenda z’amanywa (3:00pm).

Nyuma y’uno mukino wa gishuti na Etincelles, APR FC ikazakina undi mukino wa kabiri n’ikipe ya Kiyovu Sports, ni umukino uteganyijwe kuba kuwa Gatanu, tariki ya 8 Ukwakira 2021. Uyu mukino wo ukazabera kuri Stade ya Kigali i Nyamirambo.

APR FC igiye gukina iyi mikino ya gishuti idafite abakinnyi bayo batanu bahamagawe mu ikipe y’igihugu Amavubi irimo kwitegura imikino ibiri na Uganda yo gushaka itike yo kwerekeza muri Qatar mu gikombe cy’Isi.

Abakinnyi bahamagawe mu Mavubi ni kapiteni wayo Jacques Tuyisenge, Omborenga Fitina, Manishimwe Djabel na Mugunga Vyes.

APR FC ikaba iri gukina iyi mikino mu rwego rwo kwitegura imikino nyafurika ya CAF Champions League, aho izakina n’ikipe ya Etoile du Sahel. Ni nyuma yo gusezerera Mogadishu City yo muri Somalia ku bitego 2-1.

APR FC ikaba igiye gukina iyi mikino nyuma yo kwifuza kujya mu gihugu cya Tanzania gukina n’amakipe ya Azam na Simba SC ariko bikaza kwanga.

Imyitozo ya APR FC ikaba ikomereje I Shyorongi iyobowe n’umutoza mukuru wa Adlr Mohammed uvuye mu kiruhuko, gusa kugeza ubu akaba atemerewe gutoza imikino ya CAF Champions League.