Umujyi wa Dakar n’ahandi muri Senegal baraye mu byishimo, Perezida Macky Sall ubu uyoboye Umuryango wa Africa yunze Ubumwe (AU), yashyizeho umunsi w’ikiruhuko nyuma y’uko ikipe y’igihugu cye na yo iyoboye Africa.
Kuri uyu wa Mbere ni ikiruhuko muri Senegal nyuma yo kwegukana igikombe cya Africa cy’ibihugu Africa Cup of Nations (Afcon2021) itsinze Misiri kuri penaliti 4-2.
Perezida Macky Sall kuri Twitter yanditse ati “Dutwaye irushanwa rya Africa!!! Mbega umukino! Mbega ikipe! Murabikoze! Ni umwanya mwiza mu mupira w’amaguru, kandi igihugu kirabizihiye. Turabishimiye cyane! Dushimiye intwari zacu!”
Sall yari hanze ariko yahisemo kugaruka mu gihugu kugira ngo ahe ikaze ikipe yatwaye igikombe kuri uyu wa Mbere.
Perezida Macky Sall ku wa Kabiri azahemba abagize ikipe y’igihugu ibirori bizabera mu biro by’Umukuru w’Igihugu.
Senegal yageze ku mukino wa nyuma w’Igikombe cya Africa muri 2019 no muri 2002.
Ibyo bagiye bavuga
Perezida wa Komisiyo ya Africa yunze Ubumwe, Dr Moussa Faki Mahamat yishimiye kuba Senegal yatwaye igikombe.
- Advertisement -
Yandikiye Perezida Macky Sall ati “Umuyobozi w’Umuryango wa Africa. Begukanye igikombe cya Africa (AFCON champion). Ndashimira Senegal!”
Jamie Carragher wakiniye Liverpool avuga ko atumpa impamvu umukinnyi Mohamed Salah atateye penaliti.
Ati “Niyo mpamvu umukinnyi wawe wizeye ko azi gutera penaliti adakwiye gutera iya nyuma.
Mo Salah kuba atateye penaliti y’ikipe ye ya Misiri mu bandi bagombaga gutera ni ubusazi. Ndetse byabaye kuri (Cristiano) Ronaldo mu myaka ishize Portugal ikina na Espagne.”
UMUSEKE.RW
