US Monastir igiye kugaruka guhanganira na REG i Kigali muri BAL

Ikipe ya US Monastir yo muri Tunisie na Zamalek yo mu Misiri, zigiye kugaruka mu Rwanda mu irushanwa rya Basketball Africa League [BAL], guhangana n’izirimo REG izaba ihagarariye u Rwanda.

Guhera tariki 21-28 Gicurasi 2022 muri Kigali Arena hazabera irushanwa ry’imikino ya nyuma ya BAL, irushanwa rihuza amakipe arusha ayandi muri Basketball ya Afurika.

Kuri uyu wa Kabiri tariki 19 Mata 2022 nibwo yamenyekanye andi makipe ane azakina imikino ya nyuma ya BAL izabera muri Kigali Arena.

Mu irushanwa ry’uyu mwaka, u Rwanda ruzaba ruhagarariwe na REG Basketball Club kuko ubwo riheruka harimo Patriots Basketball Club yasoje ari iya kane.

Amakipe ane yari asigaye yari mu gice cy’ayakiniye mu Misiri mu cyiswe Nile Conference mu gihe REG BBC yakuye itike mu gice cya Sahara Conference i Dakar.

Zamalek (Misiri) ibitse igikombe cy’irushanwa riheruka, yasoje igice cya Nile Conference iri imbere mu itsinda inatsinda FAP amanota 77-63 (11-12,24-21,19-13,23-17).

Muri uyu mukino, Edgar Sosa wa Zamalek yatsinze amanota 27 akurikirwa na Brice Bidias wa FAP watsinze amanota 17.

Ku ruhande rwa Zamalek kandi, Ikechukwu Diogu yatsinze amanota 13 akora rebounds 11 naho Mikhael McKinney atsinda amanota icumi na rebounds eshanu.

Abandi bakinnyi ba FAP bazamuye amanota ni Cédric Kenfack watsinze 16 na Joël Almeida watsinze amanota icumi muri Hassan Moustafa Sports Hall i Caïro mu Misiri.

Zamalek yasoje iyoboye amakipe atanu bari kumwe kuko imikino itanu yakinnye itigeze itsindwa. Petro de Luanda yatsinze ine, itsindwa umukino umwe.

Cape Town Tigers yatsinze imikino ibiri, itsindwa imikino itatu ndetse na FAP mu gihe Cobra Sports na Espoir Fukash zose zatsinze umwe zitsindwa ine.

Amakipe ane ya mbere yavuye muri Nile Conference ni; Zamalek (Misiri), Petro de Luanda, Cape Towns Tigers (Afurika y’Epfo) na FAP (Forces Armées et Police Basketball) yo muri Cameroun.

Amakipe ane yandi yaboneye itike muri Sahara Conference ni; REG BBC (Rwanda), US Monastir (Tunisie), Seydou Lygacy Club (Guinée) na AS Salé (Maroc).

Irushanwa rya BAL riheruka ryatwawe na Zamalek (Misiri) itsinze US Monastir (Tunisie) ku mukino wa nyuma amanota 76-63.

Uko amakipe yasoje Nile Conference

1. Zamalek (5-0)
2. Petro de Luanda (4-1)
3. Cape Town Tigers (2-3)
4. FAP (2-3)
5. Cobra Sports (1-4)
6. Espoir Fukash (1-4)