Mu gusoza umwaka w’imikino 2022/2023 muri Volleyball ikinwa n’Abafite Ubumuga, Sitting Volleyball, ikipe yari ihagarariye Akarere ka Gasabo n’iy’Akarere ka Bugesera zegukanye igikombe cya shampiyona.
Ku wa Gatandatu no ku Cyumweru tariki 6-7 Gicurasi 2023, ni bwo habaye imikino ya nyuma ya Sitting Volleyball yabereye mu Karere ka Gisagara.
Ikipe ya Bugesera mu bagore yegukanye igikombe nyuma yo gutsindira ku mukino wa nyuma ikipe y’Akarere ka Nyarugenge ku maseti 3-0 [25-14,25-22,25-22].
Mu bagabo ikipe y’Akarere ka Gasabo (Intwari za Gasabo) yegukanye igikombe nyuma yo gutsinda Gisagara yari ibitse iki gikombe amaseti 3-0 (26-24,25-19,25-16).
Ikipe ya Mbere yahawe igikombe inahabwa amafaranga ibihumbi 150 Frw, iya Kabiri ihabwa ibihumbi 120 Frw, mu gihe iya Gatatu yahembwe ibihumbi 100 Frw.
Mu guhatanira umwanya wa Gatatu mu bagabo, ikipe y’Akarere ka Musanze yatsinze amaseti 2-0 Rusizi [25-19, 25-22].
Mu bagore Gicumbi yegukanye umwanya wa Gatatu nyuma yo gutsinda Musanze ku maseti 2-1 [25-21, 17-25, 5-10].
Umwaka ushize w’imikino mu bagabo ikipe y’Akarere ka Gisagara ni yo yari yegukanye igikombe mu bagabo, mu gihe mu bagore Bugesera ari yo yacyegukanye.
UMUSEKE.RW
