Umunyamakuru wigenga, Nkundineza Jean Paul, yajuririye icyemezo kimufunga iminsi 30 y’agateganyo.
Urukiko rw’Ibanze rwa Nyarugenge ku wa 7 Ugushyingo 2023 rwari rwategetse ko akurikiranwa afunzwe iminsi 30 y’agateganyo nk’uko Ubushinjacyaha bwari bwabisabye.
Akurikiranyweho gutukana mu ruhame, guhohotera uwatanze amakuru ku byaha, gukoresha ibikangisho no gutangaza amakuru y’ibihuha
Nyuma y’icyemezo cyo kumufunga by’agateganyo, Nkundineza, yahise akijuririra mu Rukiko Rwisumbuye rwa Nyarugenge kubera kutishimira imikirize y’urubanza mu rwego rubanza.
Urubanza mu bujurire ku ifunga n’ifungurwa ry’agateganyo, ruteganyijwe ku wa 30 Ugushyingo 2023, saa Tatu za mu Gitondo.
Ubushinjacyaha bugaragaza ko ibyaha Nkundineza yakoze bishingiye ku biganiro yagiye atanga birimo icyatambutse mu 2022 kirimo amagambo yo gutera ubwoba Miss Mutesi Jolly.
Nkundineza Jean Paul yahakanye ibyaha akekwaho, asaba Urukiko ko atakurikiranwa afunzwe ahubwo yagira ibyo ategekwa kubahiriza.
UMUSEKE.RW
