Mu rwego rwo gukomeza Kwibuka ku nshuro ya 30 Jenoside yakorewe Abatutsi muri Mata 1994, abakunzi ba Kiyovu Sports ndetse n’abayobozi b’iyi kipe, basuye Urwibutso rwa Ntarama ruri mu Karere ka Bugesera, basobanurirwa uko hiciwe Abatutsi guhera mu 1959.
Uyu muhango wabaye kuri uyu wa Gatanu. Abakunzi b’iyi kipe yo ku Mumena, bahagurukiye ahazwi nko kuri Maison Trésor bari kumwe n’Umuyobozi wa bo, Minani Hemedi ndetse n’Umuyobozi w’itsinda ry’abafana rizwi nka “Green Brigade Fan-Club, Sekabaraga Moussa.
Uretse aba kandi, ubuyobozi bwa Kiyovu Sports burangajwe imbere na Karangwa Joseph uyobora Inama y’Ubutegetsi y’iyi kipe, Mbonyumuvunyi Karim uyobora iyi kipe, Muhire usanzwe ari Visi na Jeanine usanzwe ari Umunyamabanga Mukuru, bari bahari.
Aba bakigera i Ntarama, basobanuriwe uko Abatutsi batangiye kwicwa guhera mu 1959 kugeza Jenoside yakorewe Abatutsi muri Mata 1994, ikozwe.
Umuyobozi w’abakunzi ba Kiyovu Sports ku rwego rw’Igihugu, Minani Hemedi, yasabye urubyiruko rukunda iyi kipe, kubyaza umusaruro Siporo rurwanya amacakubiri n’igisa na yo ndetse n’Ingengabitekerezo ya Jenoside.
Sekabaraga Moussa Uyobora Green Brigade Fan-Club, yishimiye ko itsinda ayoboye ryiganjemo urubyiruko ryabashije gusobanirwa amateka yaranze u Rwanda kandi ko rwiteguye kurwanya ko Jenoside yakorewe Abatutsi muri Mata 1994, yazagaruka ukundi.
Ubwo aba bakunzi b’Urucaca basobanurirwaga amateka y’Intarama, babwiwe ukuntu Leta zabanje zishe urubozo Abatutsi ubwo bazanwaga mu Karere ka Bugesera ngo bazicwe n’Isazi ya “Tsetse” yari icyago.
Batemberejwe ibice byose bigize Urwibutso rwa Ntarama, ndetse basobanurirwa buri kimwe.
Basabwe kubyaza Siporo umusaruro maze bakimika Ubumwe ndetse bagakomeza kurwanya Ingengabitekerezo ya Jenoside.
- Advertisement -
Uyu muryango mugari wa Kiyovu Sports kandi, wasoje iki gikorwa ushyira indabo ahashyinguye imibiri y’Abatutsi bashyinguye muri uru Rwibutso ndetse bafata umunota wo kubunamira no kubaha icyubahiro batswe.
Urwibutso rwa Ntarama, rushyinguyemo Abatutsi bagera ku bihumbi bitandatu bishwe muri Jenoside yakorewe Abatutsi muri Mata 1994.
UMUSEKE.RW
