Rutahizamu w’Umunya-Sénégal, Fall Ngagne yabonye izamu mu mukino wa gicuti Rayon Sports yatsinzemo Mukura VS ibitego 2-1, kuri iki Cyumweru kuri Kigali Péle Stadium.
Uyu mukino wa gicuti wateguwe mu rwego rwo gufasha amakipe yombi kudasubira inyuma muri iki gihe Shampiyona yabaye ihagaze nyuma y’Umunsi wa Gatanu, bitewe n’imikino ibiri yo gushaka itike y’Igikombe cya Afurika cya 2025 ikipe y’Igihugu ‘Amavubi’ izakinamo na Bénin muri uku kwezi.
Ku mpande zombi, abatoza bari bakoze impinduka mu bakinnyi basanzwe babanzamo nk’amahitamo yabo ya mbere. Nko kuri Rayon Sports, Abanya-Sénégal, Fall Ngagne na Youssou Diagne batabonye amahirwe yo gukina bihoraho muri shampiyona, bari babanje mu kibuga.
Mukura VS ni yo yatangiye neza umukino, ndetse hakiri kare cyane, ku munota wa cyenda ifungura amazamu. Iki gitego cy’iyi kipe y’i Huye cyatsinzwe na Sunzu Bonheur nyuma y’umupira abakinnyi ba Mukura VS bateye imbere, myugariro Omar Gning ananirwa kuwukuraho, usanga Bonheur wahise awurenza Khadime N’diaye.
Nyuma yo gufungura amazamu, Mukura VS yakomeje guhererekanya neza mu kibuga hagati, ndetse ikanagera imbere y’izamu rya Rayon Sports kenshi.
Murera itaremaga uburyo bwinshi yaje kwishyura igitego yari yatsinzwe kare. Iki gitego cyatsinzwe n’Umurundi, Ndayishimiye Richard watereye ishoti inyuma y’urubuga rw’amahina.
Bagiye kuruhuka banganya igitego 1-1.
Mu gice cya kabiri cy’umukino, amakipe yombi yagerageje kurema uburyo bw’ibitego, ariko gutsinda bikaba ingorane.
Mu minota ya nyuma y’umukino, rutahizamu Fall Ngagne yahagurukije abakunzi ba Rayon Sports batari benshi, ubwo yatsindaga igitego cy’intsinzi. Ni igitego cyaturutse ku mupira wahinduwe na Bugingo Hakim, Ngagne ahita awushyira mu izamu n’umutwe.
- Advertisement -
Umukino warangiye Gikundiro isubiriye Mukura VS nyuna yo kuyitsindira i Nyanza ibitego 2-1 mu mukino wa gicuti wabaye tariki ya 7 Nzeri, mu kwizihiza isabukuru y’imyaka 125 Umujyi wa Nyanza umaze ubayeho.
Aya makipe yombi azongera gucakirana mu mpera z’Ukuboza 2024, mu mukino w’Umunsi wa 15 wa Shampiyona uzabera i Huye.
XI ba Rayon Sports babanjemo: Khadime N’diaye, Serumogo Ally (C), Bugingo Hakim, Omar Gning, Youssou Diagne, Kanamugire Roger, Ndayishimiye Richard, Ishimwe Fiston, Adama Bagayogo, Elenga Junior Kanga na Fall Ngagne.
XI ba Mukura VS babanjemo: Tuyizere Jean Luc, Rushema Chris, Ishimwe Abdoul, Hakizimana Zuberi, Abdoul Jalilu, Ntarindwa Aimable (C), Nisingizwe Christian, Jordan Dimbumba, Mwiseneza Kevin, Sunzu Bonheur Mende na Boateng Mensah.
ISHIMWE YARAKOZE SETH KEFA/UMUSEKE.RW
