Nyuma yo gutsindwa umukino wa karindwi wikurikiranya, abakunzi ba Kiyovu Sports batabaje Umukuru w’Igihugu, Paul Kagame.
Kuri uyu wa kabiri, ikipe ya Kiyovu Sports yatsinzwe na Gasogi United ibitego 4-3 mu mukino w’umunsi wa Cyenda wa shampiyona y’Icyiciro cya mbere y’umupira w’amaguru.
Nyuma y’ibibazo byinshi byo kubura abakinnyi kandi itemerewe kongeramo abandi kubera ibihano yafatiwe na FIFA, Urucaca rukomeje gutsindwa umusubirizo.
Abakunzi b’iyi kipe yo ku Mumena, basabye Umukuru w’Igihugu, Paul Kagame ndetse basaba Leta y’u Rwanda ko yabatabara kuko ikipe ya bo igeze habi.
Abaganiriye na UMUSEKE, bagize bati “Nyakubahwa Perezida wa Repubulika, turakwinginze ngo udutabare. Ikipe yacu igeze habi ku buryo nta gikozwe ikipe imanuka.”
Abandi bati “Leta y’u Rwanda nidufashe ize icyemure ikibazo cya Kiyovu nk’uko yacyemuye icya Rayon Sports kuko abana bose ni abana. Hatagize igikorwa ikipe iragiye tureba.”
Mu gihe bamwe batabaza Umukuru w’Igihugu, abandi baratunga urutoki umuyobozi, Nkurunziza David, aho bavuga ko ikipe ayiyoborera kuri WhatsApp.
Bati “Ese ni gute wayoborera ikipe kuri WhatsApp wibereye muri Canada? Turarambiwe n’uyu Muyobozi.”
Abandi bavuze ko bakumbuye Mvukiyehe Juvénal, bavuga ko baheruka ibyishimo ubwo yayoboraga iyi kipe ndetse bavuga ko abatamushaka ari abamwambuye imyenda yabahaye ngo bamugurishirize.
- Advertisement -
Kiyovu Sports iri ku mwanya wa nyuma n’amanota atatu n’umwenda w’ibitego 14 nyuma y’imikino umunani imaze gukina.
UMUSEKE.RW
