Amavubi y’Abagore yahamagaye 28 batarimo Sifa Gloria

Abatoza b’ikipe y’Igihugu y’Abagore y’umupira w’amaguru “She-Amavubi”, yahamagaye urutonde rw’abakinnyi 28 batarimo Nibagwire Sifa Gloria, bitegura imikino ibiri ya Misiri mu gushaka itike y’Igikombe cya Afurika 2025.

Kuri uyu wa gatatu, ni bwo Ishyirahamwe ry’Umupira w’Amaguru mu Rwanda, Ferwafa, ryashyize hanze urutonde rw’abakinnyi 28 b’Amavubi y’Abagore (She-Amavubi), bazahura na Misiri mu gushaka itike y’Igikombe cya Afurika cya 2025.

Mu bakinnyi 28 bahamagawe, ntiharimo kapiteni wa bo, Nibagwire Sifa Gloria ufite uburambe kurusha abandi bose bahamagawe ku mwanya we. Ni umwiherero biteganyijwe ko uzatangira ku wa 9 Gashyantare 2025.

Rwaka Claude utoza Rayon Sports WFC ni we mutoza mukuru w’iyi kipe, akaba yungirijwe na Mukamusonera Théogenie utoza Nyaruguru WFC yo mu cyiciro cya kabiri.

Hahamagawe abanyezamu batatu barimo Ndakimana Angeline wa Rayon Sports WFC, Mutuyimana Elisabeth wa Police WFC na Uwamahoro Diane wa AS Kigali WFC.

Ba myugariro 10 bahamagawe, barimo Uzayisenga Lydia wa Police WFC, Abimana Djamila wa Rayon Sports WFC, Uwihirwe Regine wa APR WFC, Maniraguha Louise wa AS Kigali WFC, Uwase Andersene wa Rayon Sports WFC, Mukahirwa Providence wa Indahangarwa WFC, Ingabire Aline wa AS Kigali WFC, Mukantaganira Joselyne wa Rayon Sports WFC, Uwimbabazi Immaculée wa Rayon Sports WFC na Niyonkuru Goreth wa ES.Mutunda WFC.

Abakina hagati 10 bahamagawe, barimo Kayitesi Alodie wa AS Kigali WFC, Uwamariya Diane wa Forever WFC, Mukeshimana Dorothée wa Rayon Sports WFC, Umwari Uwase Dudja wa AS Kigali WFC, Uwitonze Nyirarukundo wa Rayon Sports WFC, Dukuzumuremyi Marie Claire wa Indahangarwa WFC, Mutuyemariya Florentine wa AS Kigali WFC, Niyonshuti Émerance wa Rayon Sports WFC, Usanase Zawadi wa AS Kigali WFC na Muhoza Angelique wa Rayon Sports WFC.

Hahamagawe abataha izamu batanu. Barimo Mukandayisenga Jeanine wa Yanga Princess yo muri Tanzania, Mukagatete Emeline wa Muhazi United WFC, Amizero Evelyne wa Kamonyi WFC, Ukwishaka Zawadi wa APR WFC na Mutuyimana Sandrine wa Inyemera WFC.

Biteganyijwe ko umukino ubanza uzakinwa tariki ya 21 Gashyantare i Kigali, mu gihe uwo kwishyura uteganyijwe kuzabera mu Misiri tariki 25 Gashyantare uyu mwaka.