Inama idasanzwe ya EAC yasabye Congo kuganira na M23

Abakuru b’ibihugu bya Africa y’Iburasirazuba basabye Perezida Felix Tshisekedi kwegerana n’abarebwa n’ikibazo cya Congo bose harimo na M23/AFC bakaganira.

Inama ya 24 y’abakuru b’ibihugu bigize Umuryango wa Africa y’Iburasirazuba yateranye ku ikoranabuhanga rya Video, nyiri ubwite mu bibazo by’igihugu cye, Perezida Antoine Felix Tshisekedi adahari ku bw’impamvu yavuze mbere za gahunda nyinshi yari afite.

Abandi bose bitabiriye inama, bagaragagaje impungenge batewe n’ibitero byakozwe kuri Ambadase z’ibihugu by’amahanga i Kinshasa, basaba Congo kwita kuri za Ambasade, kurengera abantu bazikoreramo n’ibintu byabo.

Abakuru b’ibihugu basabye ko abahanganye muri Congo bareka imirwano ako kanya, bakayoboka ibiganiro ndetse bagaha inzira abashaka kugeza imfashanyo ku bantu bazikeneye.

Umwanzuro wa 7 w’inama ugira uti “Inama yasabye ko habaho gukemura intambara binyuze mu bwumvikane bwuje amahoro, kandi isaba Guverinoma ya Congo kuvugana n’abantu bose barebwa n’ikibazo harimo na M23 n’indi mitwe yose ifite ibyo isaba.”  

Iyi nama yananzuye ko hazabaho guhura kw’ukuriye umuryango wa Africa y’Iburasirazuba n’umuyobozi wa SADC bakaganira ku nzira iboneye yo gukemura ikibazo cya Congo.

Perezida Tshisekedi mu ijambo yagejeje ku baturage ba Congo yavuze ko yiteguye “gusubiza M23” ku bikorwa byayo birimo no gufata umujyi wa Goma.

Inama y’abakuru b’ibihugu yanunamiye abantu bapfiriye mu mirwano mishya yo gufata umujyi wa Goma.