Ikigo cy’Igihugu cy’Iteganyagihe, Meteo Rwanda, cyatangaje ko muri Gicurasi 2026, mu Rwanda hateganyijwe imvura iri hagati ya milimetero 50 na 230, ikaba iri hasi gato y’ikigero cy’impuzandengo y’imvura isanzwe igwa muri uku kwezi yabaga iri hagati ya milimetero 62 na 250.
Ni ibikubiye mu nyandiko y’iteganyagihe iki kigo cyasohoye kuri uyu wa 30 Mata 2026.
Meteo Rwanda ivuga ko mu gice cya mbere cya Gicurasi 2026, hateganyijwe imvura izaba iri ku kigero cy’impuzandengo y’imvura isanzwe igwa, naho mu gice cya kabiri n’icya gatatu hateganyijwe imvura iri hasi gato y’ikigero cy’imvura isanzwe igwa.
Imvura iri hagati ya milimetero 200 na 230 iteganyijwe mu bice byinshi by’Uturere twa Burera, Musanze, Ngororero, Nyabihu, Karongi, Rusizi na Nyamasheke, uburengerazuba bw’Uturere twa Nyamagabe na Nyaruguru, ndetse n’uburasirazuba bw’Uturere twa Rutsiro na Rubavu.
Iki kigo gishinzwe Iteganyagihe kivuga ko imvura iri hagati ya milimetero 150 na 200 iteganyijwe mu Mujyi wa Kigali uretse igice gito cy’uburasirazuba n’amajyepfo byawo, ibice bisigaye by’Intara y’Amajyaruguru, iy’Iburengerazuba n’iy’Amajyepfo uretse ibice by’Amayaga.
Meteo iti “Imvura iri hagati ya milimetero 100 na 150 iteganyijwe ahasigaye mu Mujyi wa Kigali no mu Ntara y’Amajyepfo, mu Turere twa Nyagatare na Gatsibo uretse uburasirazuba bwatwo, ibice byo hagati n’amajyaruguru by’Akarere ka Kayonza, amajyaruguru y’Akarere ka Rwamagana, amajyepfo y’Akarere ka Ngoma no mu burasirazuba bw’Akarere ka Bugesera.”
Ahasigaye mu Ntara y’Iburasirazuba hateganyijwe imvura iri hagati ya milimetero 50 na 100.
Muri Gicurasi 2026, ubushyuhe bwo hejuru buteganyijwe ku manywa buzaba buri hagati ya dogere Selisiyusi 19 na 29, naho ubushyuhe bwo hasi buteganyijwe nijoro bukazaba buri hagati ya dogere Selisiyusi 10 na 19.
Umuyaga uringaniye ushyira kuba mwinshi ufite umuvuduko uri hagati ya metero 4 na 12 ku isegonda, uteganyijwe mu bice bitandukanye by’Igihugu.
MUGIRANEZA THIERRY/ UMUSEKE.RW
