Imikino ihuza amakipe umunani ahatanira igikombe cya shampiyona yabaye kuri uyu wa Kane, ikipe ya Rayon Sports FC yatsinze Bugesera FC ibitego 3-1, naho Kiyovu Sports itsinda Mukura VS 3-0.
Iyi kipe yo mu Karere ka Huye ikomeje kwisanga mu myanya mibi mu makipe ahanganiye kutamanuka mu cyiciro cya kabiri.
Rayon Sports ni yo yari yakiriye Bugesera i Nyamata, inahakura intsinzi yagizwemo uruhare rukomeye na Mugisha Gilbert wari umaze iminsi abanza ku ntebe y’abasimbura.
Bugesera ni yo yabanje kubona izamu ku gitego cyatsinzwe na Kapiteni wayo Rucogoza Jihad ku munota wa 33, kiza kwishyurwa na Manace Mutatu mbere y’uko igice cya mbere kirangira.
Imikino y’umunsi wa akabiri muri 1/4 cy’irangiza isize AS Kigali na APR FC ziri imbere n’amanota 4, mu gihe Rayon Sports yari yatsinzwe umukino ubanza na yo izirya isata burenge nyuma yo kubona amanota atatu y’uyu munsi.
Mu kindi cyiciro cyigizwe n’amakipe umanani ahatanira kutamanuka mu cyiciro cya kabiri, Kiyovu Sports yabashije kwitwara neza imbere ya Mukura VS, iyitsinda ibitego 3-0.
Yabifashijwemo na Saba Robert watsinze ibitego bibiri ndetse na Samson Babuwa.
Musanze FC yo yatsinze AS Muhanga 3-1 mu mukino wabereye kuri Stade Ubworoherane, mu gihe Etincelles FC yabonye amanota atatu iyakuye ku nsinzi y’ibitego 2-1 cya Sunrise FC.
REBA YouTube Channel UMUSEKE TV video nziza nk’iyi. UKORA LIKE SHARE na COMMENT
- Advertisement -
Dieudonne NSHIMIYIMANA /UMUSEKE.RW