FC Barcelona yatangaje ko yirukanye umutoza Ronald Koeman ukomoka mu Buholandi, yavuze ko Perezida w’ikipe, Joan Laporta yabimenyesheje uyu mutoza nyuma y’umukino warangiye Rayo Vallecano na yo itsinze Barcelona 1-0.
Ikipe ivuga ko Ronald Koeman kuri uyu wa Kane azasezera abakinnyi ku kibuga Ciutat Esportiva.
FC Barcelona yamwifurije amahirwe ndetse imushimira ibyo yakoze.
Ku Cyumweru gishize yari yatsinzwe na Real Madrid 2-1 ku kibuga Camp Nou. Iyi kipe ya Barcelona FC yari ikomeye mu myaka ishize ubu imerewe nabi no gutsindwa umusubizo nyuma y’uko Lionel Messi ayivuyemo akajya muri Paris St Germain ndetse n’abandi bakinnyi bakomeye barimo Luis Suarez na Antoine de Griezmann bombi bagiye muri Atletico Madrid.
Tariki 19 Kanama, 2020 nibwo Koeman yagizwe umutoza wa Barcelona, asinya amasezerano y’imyaka ibiri yari kugeza tariki 30 Kamena, 2022.
Asize Barcelona FC ku mwanya wa 9 n’amanota 15 mu gihe Real Madrid zihora zihanganye ari iya mbere n’amanota 21.
Ukeneye kwamamaza! Gusobanuza! Gutanga amakuru? Hamagara 0788772818
UMUSEKE.RW
