Ukeneye kwamamaza! Gusobanuza! Gutanga amakuru? Hamagara 0788772818
Minisiteri y’Ubuzima (MINISANTE) yatangaje ko ku wa Mbere tariki 11 Nzeri 2021 mu Rwanda habonetse abanduye Covid-19 bashya 46, bakaba babonetse mu bipimo 7,498, mu gihe nta muntu n’umwe wahitanywe n’iki cyorezo.
Nibwo bwa mbere nyuma y’amezi asaga ane, nta murwayi wishwe na Covid-19 mu masaha 24.
Imibare itangwa na Minisiteri y’Ubuzima igaragaza ko Covid-19 imaze guhitana abantu 1,308 ku butaka bw’u Rwanda.
Itangazo rya Minisante ryo ku wa 13 Kamena 2021 ni ryo ryaherukaga gusohoka ryerekana ko nta murwayi wishwe na COVID-19.
Nyuma ya 13 Kamena 2021, raporo ngarukamunsi ya Minisiteri y’Ubuzima yasohokagaho urutonde rw’abishwe na Covid-19.
Kuri uyu wa 11 Ukwakira 2021, mu bipimo 7, 498 byafashwe mu masaha 24, abantu 46 nibo banduye Covid-19.
Abahawe doze ya mbere y’urukingo ni 193,091 na ho abahawe doze ya kabiri ni 2,110.
Guhera kuri uyu wa Mbere taliki ya 11 Ukwakira 2021, Inzego z’ubuzima zatangiye icyiciro gishya cyo gukingira mu buryo bwagutse kigiye gukorerwa mu Turere 12 two hanze y’Umujyi wa Kigali. Minisiteri y’Ubuzima yatangaje ko hagiye gutangwa doze zisaga miliyoni mu gihe cy’iminsi 10 gusa.
- Advertisement -
Inkingo u Rwanda rukoresha mu rugamba rwo guhangana n’icyorezo cya COVID-19 zirimo izo rubona binyuze muri gahunda mpuzamahanga yo gusaranganya inkingo ya COVAX n’iya AVAT ijyanye n’ubufatanye bw’ibihugu by’Afurika, ubufatanye rufitanye n’indi bihugu by’inshuti ndetse n’izo u Rwanda rugura ubwarwo.
Kugeza ubu abamaze gukingirwa baragera kuri 13% by’abaturarwanda bagomba gukingirwa mu gihe intego ari iyo kugera nibura kuri 60% by’abaturage bitarenze muri Kamena 2022.
Leta y’u Rwanda ikomeje gushishikariza buri wese kutadohoka mu gukurikiza ingamba zashyizweho by’umwihariko babashishikariza kwikingiza kugira ngo intego yo guhashya iki cyorezo binyuze mu gukingira umubare munini igerweho.
NDEKEZI JOHNSON / UMUSEKE.RW