Xavi Hernandez wahoze ari mukinnyi wo hagati mu kibuga mu ikipe ya Fc Barcelone yo mu Butaliyani, yasinye amasezerano yo kuyibera umutoza kugeza mu mwaka wa 2024.
Xavi Hernandez w’imyaka 41, yari asanzwe ari umutoza w’ikipe yitwa Al Sadd yo muri Quatar kuva mu mwaka wa 2019, ku munsi w’ejo ku wa gatanu tariki 05 Ugushyingo 2021, ikipe ya Al Sadd nyuma yo kumvikana na Fc Barcelone yemeye kurekura uyu mutoza.
Barcelone ivuga ko aya masezerano azatangirana n’igice cy’umwaka w’imikino gisigaye 2021-2022 agakomeza kugeza mu myaka ibiri izakurikira.
Xavi ategerejwe mu gihugu cya Espagne mu mpera z’iki cyumweru, biteganyijwe ko kuwa mbere aribwo azerekanwa ku mugaragaro i Nou Camp.
Xavi Hernandez yavuze ko igihe cyose yahoraga yiteguye kugaruka i Nou Camp kuko “atahasezeye burundu”.
Mu myaka 17 yakiniye ikipe ya Fc Barcelone, Xavi Hernandez yayikinnye imikino 767, ayihesha ibikombe 25, yasezeye muri iyi kipe mu mwaka wa 2015 ubwo yerekezaga muri Al Sadd nk’umukinnyi nyuma muri 2019 akaza kuyibera umutoza.
Fc Barcelone ihanganye n’ikibazo cy’amikoro, iri ku mwanya wa 9 muri La Liga, imaze gutsinda imikino ine gusa mu mikino 11 imaze gukina, irushwa amanota 9 na Real Sociedad iri ku mwanya wa mbere muri La Liga.
Ukeneye kwamamaza! Gusobanuza! Gutanga amakuru? Hamagara 0788772818
- Advertisement -
NDEKEZI JOHNSON / UMUSEKE.RW