Mu mukino w’umunsi wa 23 wa shampiyona, nyuma yo kumara imikino ine iheruka itabona intsinzi, ikipe ya Rayon Sports yatsinze Gorilla FC.
Ni umukino wabereye kuri Stade ya Kigali i Nyamirambo kuri uyu wa Gatandatu.
Uyu mukino wayobowe na Nsabimana Célestin, watangiye ikipe ya Gorilla FC ari yo yiharira umupira ariko kubonaza izamu bikomeza kuyibera ingume.
Gusa ku burambe bwa Rayon Sports, yanyuzagamo umupira ifite na yo ikawuhanahana neza binyuze kuri Nishimwe Blaise na Muhire Kevin.
Ku munota wa 33, nibwo ibintu byaje guhinduka ubwo Moussa Essenu yatsindiraga Rayon Sports igitego ku mupira wari uteretswe ugatangwa na Muhire Kevin.
Igice cya kabiri cyatangiranye impinduka kuri Gorilla FC ikuramo Sindambiwe Protais ishyiramo Mohamed Camara.
Rayon Sports yahise ihindura uburyo bw’imikinire hagati mu kibuga ikoresha Mugisha François akinana na Muhire Kevin ndetse na Nishimwe Blaise.
Izi mpinduka zafashije Rayon Sports kongera gutembereza umupira hagati mu kibuga binatuma Essombe Willy Onana yongera kubona imipira.
Gorilla yahise isimbuza, Mercy Duru na Janvier Ineza basimbura Frank Laura na Iracyankunda Rodrigue ku munota wa 66.
- Advertisement -
Rayon Sports na yo yahise ikuramo Ishimwe Kevin asimburwa na Manasseh Mutatu ku munota wa 71.
Gorilla yakinishaga Nshimirimana Tharcisse, Duru Mercy na Uwimana Emmanuel Djihad mu kibuga hagati bashaka kugabanya umuvuduko wa Rayon Sports.
Ku munota wa 75 Gorilla FC yasimbuje, Nshimiyimana Tharcisse aha umwanya Karuta Buha ishaka kuzamura ubusatirizi.
Ku munota wa 78 Rayon Sports yasimbuje Essombe Willy Onana aha umwanya Mujyanama Fidèle washyizwe mu busatirizi asanzwe yugarira.
Gorilla FC yafashe iminota 10 ya nyuma ishaka igitego binazana igitutu kuri Rayon Sports ndetse na Niyigena Clement arahavunikira ariko nyuma agaruka mu kibuga.
Umusifuzi mpuzamahanga, Mukasanga Salima, yazamuye iminota 5 y’inyongera, Rayon Sports ihita ikuramo Muhire Kevin ishyiramo Byumvuhore Trésor.
Byumvuhore yahise akorana na Mugisha François bityo Nishimwe Blaise abakina imbere ari inyuma ya Moussa Essenu.
Uko indi mikino yarangiye:
– Mukura VS 1-2 Espoir FC
– Marines FC 2-1 Gicumbi FC
– Imikino iteganyijwe ku Cyumweru:
● AS Kigali FC vs Etincelles FC (15h, Stade ya Kigali)
● Bugesera FC vs APR FC (15h, Stade ya Bugesera)
UMUSEKE.RW