Rutahizamu ukomoka muri Norvège, Erling Braut Haaland wakiniraga ikipe ya Borussia Dortmund, yasinyiye Manchester City yo mu Bwongereza.
Mu bakurikiranira hafi umupira w’amaguru ku mugabane w’i Burayi, nta wushidikanya ku bushobozi bwa rutahizamu ukiri muto, Erling Braut Haaland wakiniraga Borussia Dortmund yo mu Budage.
Ikipe ya Manchester City, ibinyujije ku mbuga nkoranyambaga za yo, yatangaje ko ubwumvikane bwose hagati yayo na Borussia Dortmund kuri Erling Braut Haaland, bwarangiye, cyane ko ari yo nyiri umukinnyi.
Uyu rutahizamu w’imyaka 21, ibinyamakuru byo ku mugabane w’i Burayi biravuga ko yasinye amasezerano y’imyaka itanu izamugeza mu 2027, akaba yatanzweho miliyoni 60 z’amayero [60m euros], angana na miliyoni 51 n’ibihumbi 200 by’amapawundi (£51.2m).
Mu mikino yakiniye amakipe atatu arimo na Dortmund, Molde, Red Bull Salzburg, yatsinze ibitego 92 mu mikino 121. Mu mikino ihuza amakipe yabaye aya Mbere iwayo ku mugabane w’i Burayi [UEFA Champions League], Haaland yabaye umukinnyi ukiri muto wabashinje gutsinda ibitego 20.
Umubyeyi w’uyu rutahizamu [Papa we], Alf-Inge yakiniye Manchester City mu 2000 no mu 2003 mbere yo kwerekeza muri Leeds United na Nottingham Forest.
Haaland azajya ahembwa hafi ibihumbi 375 by’amapawundi [£375,000] ku Cyumweru. Manchester City igomba guha Borussia Dortmund angana na miliyoni 75 z’amayero [€75m] nk’uko amasezerano yabivugaga.
Uyu rutahizamu yamaze gukora ikizami cy’ubuzima, akazerekanwa nyuma y’isozwa rya shampiyona yo mu Budage isigaje umukino umwe ngo ishyirweho akadomo.
Erling Haaland yavukiye mu Bwongereza mu Mujyi wa Leeds United, ariko akinira ikipe y’igihugu ya Norvège.
- Advertisement -
HABIMANA SADI/UMUSEKE.RW
