Nyuma yo gutangaza ko abifuza kuzareba umukino wa AS Kigali FC na ASAS Djibouti Télécom yo muri Djibouti bazinjirira ubuntu, ubu iyi myanya yose yamaze kuzura hasigaye iyo mu cyubahiro [VIP] ku bazishyura ibihumbi 10 Frw.
Ku Cyumweru tariki 18 Nzeri 2022 ni bwo hateganyijwe umukino wo kwishyura mu marushanwa Nyafurika ahuza amakipe yegukanye ibikombe iwayo, CAF Confederation Cup.
Amakuru aturuka mu buyobozi bwa AS Kigali FC aremeza ko imyanya yose y’ubuntu yamaze kuzura. Bisobanuye ko isigaye ari iyo mu cyubahiro ku bazishyura ibihumbi 10 Frw.
Abazishyura muri iyi myanya yo mu cyubahiro, ntibazicwa n’inzara cyangwa n’inyota. Aya matike yamaze kujya hanze guhera ku wa Kane tariki 15 Nzeri.
Ikipe izasezerera indi muri izi, izahita ihura na Al Nasry yo muri Libya.
UMUSEKE.RW