Mu mikino yasozaga irushanwa ry’Intwari, ‘Heroes Volleyball Tournament 2023’, ikipe ya REG Volleyball Club yegukanye itsinze Gisagara VC mu bagabo, mu gihe ikipe ya APR WVC yacyegukanye mu bagore itsinze Forefront WVC.
Ni irushanwa ryatangiye ku wa Gatandatu tariki 28 Mutarama 2023, risozwa ku Cyumweru tariki 29 Mutarama 2023. Ryakiniwe ku kibuga cya Kimisagara, rikinwa n’amakipe yabaye ane ya mbere muri buri cyiciro.
Mu bagore, ryari ryitabiriwe na APR, RRA, Forefront na Ruhango. Mu bagabo ho hitabiriye REG, APR, Gisagara na Forefront.
Ku wa Gatandatu habanje gukinwa imikino ya ½ mu byiciro byombi, mu bagore ikipe ya APR WVC yageze ku mukino wa nyuma isezereye Ruhango WVC, mu gihe Forefront yari yasezereye RRA.
Ikipe y’Ingabo mu bagore, yegukanye iki gikombe itsinze Forefront amaseti 3-2, RRA WVC yo yegukana umwanya wa Gatatu itsinze Ruhango WVC ku maseti 3-0.
Muri basaza ba bo, REG VC yacyegukanye itsinze Gisagara VC amaseti 3-2 mu mukino wari ukomeye, Forefront VC yo yegukanye umwanya wa Gatatu itsinze APR VC amaseti 3-0.
REG VC yongeraga gutsinda Gisagara VC nyuma yo kuyitsinda ku mukino wa shampiyona ikanayitwara igikombe, mu gihe na APR WVC yasubiraga Forefront yaherukaga gutwara igikombe cya shampiyona.
Ikipe ya mbere mu byiciro byombi, yahembwe igikombe, izabaye iza kabiri n’izabonye umwanya wa gatatu.
Mu kwezi kwa Gashyantare uyu mwaka, biteganyijwe ko hazakinwa imikino y’irushanwa rya Volleyball ikinirwa ku mucanga rizabera ku bibuga bitandukanye biri hanze ya Kigali n’andi marushanwa atandukanye arimo ahuza Abapolisi.
- Advertisement -
UMUSEKE.RW
